പ്രത്യാക്രമണത്തിന്റെ തിരമാലകള്‍ സൃഷ്ടിച്ചു 54ാം മിനുട്ടില്‍ നെയ്‌തെടുത്ത മുന്നേറ്റത്തിലായിരുന്നു കേരളത്തിന്റെ വിജയ ഗോള്‍ പിറന്നത്. ജിതിന്‍ ഗോപാല്‍ ലോബ് ചെയ്ത പന്ത് വലത് വിങില്‍ എം.എസ് ജിതിന്‍ പിടിച്ചെടുത്തു. പന്തുമായി വലത് വിങിലൂടെ സോളോ റണ്‍ നടത്തി ജിതിന്റെ മുന്നേറ്റം. ബോക്‌സിന് പുറത്ത് നിന്ന് ജിതിന്‍ ഗോള്‍ മുഖത്തേക്ക് പന്ത് നീട്ടി നല്‍കി. ഒരേ പോലെ ഓടിക്കയറി വി.കെ അഫ്ദലും അനുരാഗും. പന്ത് പിടിച്ചെടുത്ത അനുരാഗ് ഷോട്ട് ഉതിര്‍ത്തു. പോസ്റ്റില്‍ തട്ടി പന്ത് റീബൗണ്ടായി. പന്ത് അഫ്ദലിലേക്ക്. അഫ്ദലിന്റെ ഷോട്ട് മിസോറം പ്രതിരോധത്തില്‍ തട്ടില്‍ മടങ്ങി. ഒന്നില്‍ പിഴച്ച അഫ്ദലിന് രണ്ടില്‍ പിഴച്ചില്ല. റീബൗണ്ട് പിടിച്ചെടുത്ത് ലക്ഷ്യം തെറ്റാതെ അഫ്ദല്‍ പന്ത് മിസോറം ഗോള്‍വലയിലാക്കി.