ന്യൂഡല്‍ഹി: ഹാദിയാ കേസില്‍ ഹൈക്കോടതിയുടെ ഭാഗത്തുനിന്നുണ്ടായ നീതിനിഷേധം നിറഞ്ഞതും നിയമപിന്‍ബലമില്ലാത്തുമായ വിധിയെ തിരുത്തുകയാണ് സുപ്രിംകോടതി ചെയ്തതെന്ന് കേസിലെ അഭിഭാഷകന്‍ ഹാരിസ് ബീരാന്‍ അഭിപ്രായപ്പെട്ടു. ഇതാണ് നിയമം എന്നു സുപ്രിംകോടതി ഹൈക്കോടതിക്കു കാണിച്ചുകൊടുത്തിരിക്കുന്നു.

ഭരണഘടനയുടെ 21-ാം വകുപ്പ് പ്രകാരം ഏതൊരു പൗരനുമുള്ള മൗലികമായ അവകാശം ഹാദിയക്ക് നിഷേധിക്കപ്പെട്ടു. അവരുടെ സ്വകാര്യകാര്യങ്ങളില്‍ വരെ ഹൈക്കോടതി ഇടപെട്ടു. ഇതെല്ലാം ഗുരുതര നിയമ വീഴ്ചയായിട്ടാണ് സുപ്രിംകോടതി കണ്ടെത്തിയിരിക്കുന്നത്. ഇതു കേസിന്റെ തുടക്കംമുതല്‍ ഞങ്ങള്‍ ചൂണ്ടിക്കാട്ടിയ കാര്യമാണെന്നും അദ്ദേഹം സുപ്രഭാതത്തോട് പറഞ്ഞു.

ഒരു ഹേബിയസ് കോര്‍പസ് ഹരജിയില്‍ അതില്‍ പരാമര്‍ശിക്കപ്പെട്ട വ്യക്തിയുടെ സ്വകാര്യ കാര്യങ്ങളില്‍ ഇടപെട്ട് ഹൈക്കോടതി അന്വേഷണം പ്രഖ്യാപിക്കാന്‍ പാടില്ലായിരുന്നു. ഹരജിയില്‍ പറഞ്ഞ വ്യക്തിയെ കോടതിയില്‍ ഹാജരാക്കി, അവരുടെ നിലപാട് അറിഞ്ഞ ശേഷം അതനുസരിച്ച് നടപടിയെടുക്കുകയാണ് ഒരു കോടതി ചെയ്യേണ്ടത്. ഇവിടെ അതുണ്ടായില്ല. അത് ഏറ്റവും വലിയ നിയമലംഘനമാണ്.

കേസില്‍ ഒരുഘട്ടത്തില്‍ സുപ്രിംകോടതി എന്‍.എ.ഐ അന്വേഷണത്തിന് ഉത്തരവിട്ടെങ്കിലും ഇപ്പോള്‍ അവര്‍ക്ക് തന്നെ അതുവേണ്ടിയിരുന്നില്ല എന്നു തോന്നല്‍ ഉളവാക്കുന്നതാണ് അവസാന ഖണ്ഡികയിലെ പരാമര്‍ശങ്ങള്‍. എന്‍.ഐ.എ അവരുടെ നിയമത്തില്‍ പറഞ്ഞ അധികാപരിധിക്കുള്ളില്‍ നിന്നു മാത്രമെചെയ്യാന്‍ പാടുള്ളൂ. അതുപോലെ വിവാഹം പോലുള്ളതില്‍ ഇടപെടരുതെന്നും സുപ്രിംകോടതി ആവശ്യപ്പെട്ടിട്ടുണ്ട്. പ്രതീക്ഷിച്ച വിധി തന്നെ കോടതിയില്‍ നിന്നുണ്ടായിരിക്കുന്നത്. ഇതു വളരെ സ്വാഗതാര്‍ഹമാണെന്നും ഹാരിസ് ബീരാന്‍ പറഞ്ഞു.