കണ്ണൂര്‍: തൊഴില്‍ മേഖലയില്‍ കരിനിയമം കൊണ്ടുവന്ന് തൊഴിലാളികളെ ചൂഷണം ചെയ്യാന്‍ കേന്ദ്ര സര്‍ക്കാര്‍ കോര്‍പറേറ്റുകള്‍ക്ക് സാഹചര്യമൊരുക്കി കൊടുക്കുകയാണെന്ന് ഡി.സി.സി പ്രസിഡന്റ് സതീശന്‍ പാച്ചേനി. ഓള്‍ ഇന്ത്യ അണ്‍ ഓര്‍ഗനൈസ്ഡ് വര്‍ക്കേഴ്‌സ് കോണ്‍ഗ്രസ് എക്‌സിക്യൂട്ടീവ് ക്യാംപ് ജി.എസ്.ടി.യു ഹാളില്‍ ഉദ്ഘാടനം ചെയ്യുകയായിരുന്നു അദ്ദേഹം. കേന്ദ്ര സംസ്ഥാന സര്‍ക്കാരുകളുടെ തൊഴിലാളി വിരുദ്ധ നിലപാടില്‍ പ്രതിഷേധിച്ച് ജില്ലയിലെ 11 കേന്ദ്രങ്ങളില്‍ തൊഴില്‍ സംരക്ഷണ കണ്‍വന്‍ഷന്‍ നടത്താനും മെഡിക്കല്‍ മേഖലയില്‍ ജോലിചെയ്യുന്ന തൊഴിലാളികളുടെ സംഘടന രൂപീകരിക്കാനും ജില്ലയിലെ മുഴുവന്‍ പഞ്ചായത്തുകളിലും കോര്‍പറേഷന്‍ പരിധിയിലും മുനിസിപ്പാലിറ്റിയിലും സംഘടനാ പ്രവര്‍ത്തനം വ്യാപിപ്പിക്കാനും കമ്മിറ്റികള്‍ രൂപീകരിക്കാനും തീരുമാനിച്ചു. ജില്ലയില്‍ 25,000 മെമ്പര്‍മാരെ സംഘടനയില്‍ ചേര്‍ക്കാനും ജില്ലാതല മെമ്പര്‍ഷിപ്പ് കാംപയിനിന്റെ ഉദ്ഘാടനം ഇരിക്കൂറില്‍ നടത്താനും തീരുമാനിച്ചു. എ.ഐ.യു.ഡബ്ല്യു.സി ജില്ലാ പ്രസിഡന്റ് നൗഷാദ് ബ്ലാത്തൂര്‍ അധ്യക്ഷനായി. സംസ്ഥാന പ്രസിഡന്റ് അഡ്വ. സവിന്‍ സത്യന്‍ മുഖ്യാതിഥിതിയായി. നേതാക്കളായ എ.പി അബദുല്ലക്കുട്ടി, മമ്പറം ദിവാകരന്‍, എന്‍.എസ് നാസര്‍, എം.കെ മോഹനന്‍, ജോഷി കണ്ടത്തില്‍, പി.ടി അജയകുമാര്‍, കുര്യാക്കോസ്, എം.ഒ മാധവന്‍, ഷാഫി കോര്‍ളായി സംസാരിച്ചു.