ചങ്ങനാശേരി: വിദ്യാഭ്യാസ രംഗത്ത് സി.എം.സി സന്യാസിനി സമൂഹത്തിന്റെ ചരിത്രപരമായ മുന്നേറ്റം പ്രശംസനീയമാണെന്ന് ആര്‍ച്ച് ബിഷപ് മാര്‍ ജോസഫ് പൗവ്വത്തില്‍. ചങ്ങനാശേരി സി.എം.സി ഹോളിക്വീന്‍സ് പ്രൊവിന്‍സിന്റെയും മൗണ്ട് കാര്‍മല്‍ മഠത്തിന്റെയും മൂന്ന് ദിവസം നീണ്ടുനില്‍ക്കുന്ന ശതോത്തര രജത ജൂബിലി ആഘോഷങ്ങള്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ആതുരശുശ്രൂഷാ സേവന രംഗത്ത് വിശിഷ്ടമായ നേതൃത്വമാണ് ഇവര്‍ നിര്‍വഹിച്ചിട്ടുള്ളത്. സിവില്‍ നിയമങ്ങള്‍ കൂടുതല്‍ മനസിലാക്കി അത് പാലിക്കുവാന്‍ നാം കടപ്പെട്ടവരാണെന്നും സഭ വെല്ലുവിളികള്‍ നേരിടുന്ന ഈ കാലഘട്ടത്തില്‍ പരാതികള്‍ക്കിടം കൊടുക്കാതെ വിദ്യാഭ്യാസ രംഗത്ത് പ്രവര്‍ത്തിക്കണമെന്നും അദ്ദേഹം ഉദ്‌ബോധിപ്പിച്ചു.ആര്‍ച്ച് ബിഷപ് മാര്‍ ജോസഫ് പൗവ്വത്തില്‍ ജൂബിലി പതാക ഉയര്‍ത്തി. വികാരി ജനറാള്‍ ഫിലിപ്‌സ് വടക്കേക്കളം കുര്‍ബാന അര്‍പ്പിച്ചു. പ്രൊവിന്‍ഷ്യല്‍ സിസ്റ്റര്‍ സുമ റോസ്, സി.എം.സി മുന്‍ സുപ്പീരിയര്‍ ജനറല്‍ സി. സാങ്റ്റ, സി. ജോയിസ് സി.എം.സി, സിസ്റ്റര്‍ പ്രസന്ന സി.എം.സി, സിസ്റ്റര്‍ ജെയ്ന്‍ സി.എം.സി പ്രസംഗിച്ചു. സമരിയ മിനിസ്ട്രി ടീമിന്റെ നേതൃത്വത്തില്‍ ഫാ. ഫിലിപ്പ് തയ്യില്‍, ഫാ.ബിജി കോയിപ്പള്ളി തുടങ്ങിയവര്‍ ആരാധന നയിച്ചു.
അസംപ്ഷന്‍ കോളജ് ബിഷപ് ലെവീഞ്ഞ് നഗറില്‍ നടക്കുന്ന വിശ്വാസ പ്രബോധന സെമിനാറിന്റെ ഉദ്ഘാടനം സഹായമെത്രാന്‍ മാര്‍ തോമസ് തറയില്‍ നിര്‍വഹിച്ചു. വിശുദ്ധ ചാവറയച്ചന്റെ ചാവരൂളിന്റെ 150-ാം വാര്‍ഷികത്തിന്റെ ഭാഗമായി ഡോ. സി.വി ആനന്ദ ബേസ് ക്ലാസ് നയിച്ചു.