വെഞ്ഞാറമൂട്: സ്വകാര്യ ദന്തല്‍ കോളജിലെ മൂന്ന് ബി.ഡി.എസ് വിദ്യാര്‍ഥികളെ കാണാതായതായി പരാതി.
സീനിയര്‍ വിദ്യാര്‍ഥികളുടെ റാഗിങുമായി ബന്ധപ്പെട്ട പ്രശ്‌നമാണ് കാരണമെന്ന് ആരോപണമുണ്ട്. വട്ടപ്പാറ പി.എം.എസ് ദന്തല്‍ കോളജിലെ ഒന്നാം വര്‍ഷ വിദ്യാര്‍ഥികളായ തിരുവനന്തപുരം മണക്കാട് പുതുക്കുളങ്ങരബിസ്മില്ലാ മന്‍സിലില്‍ മുഹമ്മദ് ഇസ്‌ലാന്‍, കൊല്ലം കായംകുളം നെടുമ്പറമ്പില്‍ അബ്ദുല്ല, വെഞ്ഞാറമൂട് തണ്ട്രാംപൊയ്കയില്‍ ഗോവിന്ദ് എന്നിവരെയാണ് കാണാതായത്.
തിങ്കളാഴ്ച കോളജില്‍ വെച്ച് മുതിര്‍ന്ന വിദ്യാര്‍ഥികള്‍ ഇവരെ റാഗ് ചെയ്തതായി പരാതിയുണ്ടായിരുന്നു. ഇവരെ വൈദ്യുതാഘാതം ഏല്‍പ്പിച്ചെന്നാണ് ബന്ധുക്കള്‍ പറയുന്നത്. കഴിഞ്ഞ ദിവസം രാവിലെ വീട്ടില്‍ നിന്നിറങ്ങിയ വിദ്യാര്‍ഥികള്‍ കോളജിലെത്തിയില്ല. മൊബൈല്‍ ഫോണ്‍ സ്വിച്ച് ഓഫ് ആക്കിയ നിലയിലാണ്.
വെഞ്ഞാറമൂട് പൊലിസ് കേസെടുത്ത് അന്വേഷണം ആരംഭിച്ചു. കോളജുമായി ബന്ധപ്പെട്ട് നിരവധി പരാതികളും ആരോപണങ്ങളും നിലവിലുണ്ടെന്ന് രക്ഷിതാക്കള്‍ പറയുന്നു.