പെരിന്തല്‍മണ്ണ: സാംസ്‌കാരിക വകുപ്പിന്റെ സഹകരണത്തോടെ പെരിന്തല്‍മണ്ണ നഗരസഭ സംഘടിപ്പിക്കുന്ന വള്ളുനാട് തനിമ സാംസ്‌കാരിക മഹോത്സവത്തിന്റെ എട്ടാം ദിവസത്തെ സാംസാകാരിക സായാഹ്നം വ്യത്യസ്ത തൊഴില്‍ മേഖലയിലുള്ളവരടെ ഒത്തുചേരലിന് വേദിയായപ്പോള്‍ എല്ലാ വ്യത്യാസങ്ങളും മറന്ന് പണിയെടുക്കുന്നവര്‍ എന്ന ഒറ്റ വികാരത്തിന്‍കീഴില്‍ അവര്‍ ഒരുമിക്കുകയായിരുന്നു. ജീവനക്കാരും അധ്യാപകരും തൊഴിലാളികളും മഹോത്സവ നഗരിയിലെ സാസ്‌കാരിക സദസില്‍ പങ്കാളികളായി. ഇവര്‍ക്കിടയിലെ പ്രതിഭകളെ ആദരിക്കുന്ന ചടങ്ങും സാംസ്‌കാരിക സദസിനോടനുബന്ധിച്ചു നടന്നു.
ഡോ. സി.പി ചിത്രബാനു സാംസ്‌കാരിക സദസ് ഉദ്ഘാടനം ചെയ്തു. നഗരസഭ സ്ഥിരസമിതി ചെയര്‍മാന്‍ കെ.സി മൊയ്തീന്‍കുട്ടി അധ്യക്ഷനായി. താഴേക്കോട് പഞ്ചായത്ത് പ്രസിഡന്റ് എ.കെ നാസര്‍, മേലാറ്റൂര്‍ പഞ്ചായത്ത് പ്രസിഡന്റ് വി. കമലം, ടി.കെ ജയന്‍, വി.സി ശങ്കരനാരായണന്‍, എന്‍. നാസര്‍, പി. തുളസീദാസ്, സി.പി രാമദാസ്, കൗണ്‍സിലര്‍മാരായ കെ.ടി ഷഫീന, തെക്കത്ത് ഉസ്മാന്‍, നിഷ സുബൈര്‍, കെ.പി ആസ്യ, സി. അബ്ദുല്‍ നാസര്‍, സിദ്ദീഖ് നാലകത്ത് ഗ്രനേറ്റ്‌സ്, കെ.ടി അബ്ദുല്‍ നാസര്‍ ക്ലാരസ്, സബ് കമ്മിറ്റി ചെയര്‍മാന്‍ കെ.ടി സെയ്ത്, കണ്‍വീനര്‍ കെ. പങ്കജാക്ഷന്‍ സംസാരിച്ചു.
പ്രാദേശിക കലാകാരന്‍മാരുടെ കലാ പ്രകടനങ്ങളുടെ ഭാഗമായി കെ.കെ മുഹമ്മദാലി വയലിന്‍ സോളോ അവതരിപ്പിച്ചു. തുടര്‍ന്ന് കണ്ണൂര്‍ 'താവം ഗ്രാമവേദി' അവതരിപ്പിച്ച നാടന്‍പാട്ട് ആസ്വാദകര്‍ക്ക് വേറിട്ട അനുഭവമായി. മഹോത്സവ വേദിയില്‍ വനിതാ സാംസ്‌കാരിക സദസ് ഇന്ന് വൈകിട്ട് 4.30ന് പി. അബ്ദുല്‍ ഹമീദ് എം.എല്‍.എ ഉദ്ഘാടനം ചെയ്യും.
പ്രതിഭകളെ ആദരിക്കല്‍ വൈകിട്ട് ആറിന് നടക്കും. പത്മലത മോഹന്‍ അവതരിപ്പിക്കുന്ന മോണോ ആക്ട്, സി. അഞ്ജലിയുടെ ഗാനം അനശ്വര പാതായ്ക്കര അവതരിപ്പിക്കുന്ന തിരുവാതിരക്കളി 6.30ന്. വൈകിട്ട് ഏഴിന് ഐഡിയ സ്റ്റാര്‍ സിംഗര്‍ ദുര്‍ഗയും സംഘവും ഒരുക്കുന്ന മെഗാഷോ നടക്കും.