മോണ്ടെ കാര്‍ലോ: കളിമണ്‍ കോര്‍ട്ടിലെ രാജാവ് താന്‍ തന്നെയെന്ന് ലോക ഒന്നാം നമ്പര്‍ താരം സ്‌പെയിനിന്റെ റാഫേല്‍ നദാല്‍ സംശയത്തിനിടയില്ലാതെ വ്യക്തമാക്കി. മോണ്ടെ കാര്‍ലോ മാസ്റ്റേഴ്‌സ് ടെന്നീസ് കിരീടം 11ാം തവണയും സ്വന്തമാക്കി നദാല്‍ കുതിപ്പ് തുടരുന്നു.
ഓപണ്‍ ഇറയില്‍ ഒരു ടൂര്‍ണമെന്റില്‍ 11 തവണ കിരീടം നേടുന്ന ആദ്യ താരമെന്ന റെക്കോര്‍ഡും നദാല്‍ സ്വന്തം പേരില്‍ കുറിച്ചു. ഫൈനലില്‍ ജപ്പാന്‍ താരം കെയ് നിഷികോരിയെ അനായാസം വീഴ്ത്തിയാണ് നദാലിന്റെ നേട്ടം. ഫൈനല്‍ പോരാട്ടം രണ്ട് സെറ്റ് മാത്രം നീണ്ടപ്പോള്‍ 6-3, 6-2 എന്ന സ്‌കോറിന് എതിര്‍ താരത്തിന് ഒരു വെല്ലുവിളിയും ഉയര്‍ത്താന്‍ സമയം നല്‍കാതെ സ്പാനിഷ് താരം കിരീടം സ്വന്തമാക്കുകയായിരുന്നു. കരിയറിലെ 31ാം മാസ്റ്റേഴ്‌സ് കിരീടം കൂടിയാണ് നാദല്‍ മോണ്ടെ കാര്‍ലോയില്‍ സ്വന്തമാക്കിയത്.