കൊച്ചി: മനുഷ്യാവകാശ കമ്മിഷനെ വിമര്‍ശിച്ച മുഖ്യമന്ത്രിയുടെ നടപടിക്കെതിരേ ശ്രീജിത്തിന്റെ കുടുംബം രംഗത്ത്. സംഭവത്തെക്കുറിച്ച് ഒന്നന്വേഷിക്കാന്‍ പോലും മുഖ്യമന്ത്രി തയാറായിട്ടില്ല. കമ്മിഷനെതിരായ മുഖ്യമന്ത്രിയുടെ വിമര്‍ശനം തെറ്റായിപ്പോയി. മകന്റെ മരണത്തില്‍ ഇടതുനേതാക്കള്‍ക്ക് പങ്കുള്ളതിനാലാണ് സി.ബി.ഐ അന്വേഷണത്തെ സര്‍ക്കാര്‍ എതിര്‍ക്കുന്നത്. ഇങ്ങനെയുള്ള മുഖ്യമന്ത്രിക്ക് മനുഷ്യാവകാശ കമ്മിഷനെ വിമര്‍ശിക്കാന്‍ എന്തവകാശമാണുള്ളതെന്നും കുടുംബം ചോദിച്ചു.
കമ്മിഷന്‍ ആത്മാര്‍ഥമായാണ് സംഭവത്തില്‍ ഇടപെട്ടതെന്ന് ശ്രീജിത്തിന്റെ അമ്മ ശ്യാമള പറഞ്ഞു. വീട്ടിലെത്തി വിവരങ്ങള്‍ അന്വേഷിക്കുകയും ശ്രീജിത്തിനെ ചികിത്സിച്ച ഡോക്ടര്‍മാരോട് കാര്യങ്ങള്‍ ആരായുകയും ചെയ്തിരുന്നു. തങ്ങള്‍ക്ക് നീതി ലഭിക്കുന്നതിന് ആത്മാര്‍ഥമായ ഇടപെടലുകളാണ് മനുഷ്യാവകാശ കമ്മിഷനില്‍നിന്നുണ്ടാകുന്നത്. ഇടതുപക്ഷത്തിന്റെ പ്രതിനിധികളോ ഒരു ലോക്കല്‍ സെക്രട്ടറിയോ പോലും തങ്ങളെ കാണാന്‍ ഇതുവരെയും വന്നിട്ടില്ലെന്നും ശ്രീജിത്തിന്റെ സഹോദരന്‍ രഞ്ജിത്ത് പറഞ്ഞു.