നാദാപുരം (കോഴിക്കോട്): ഹജ്ജിന് തുടര്‍ച്ചയായ അഞ്ചാംവര്‍ഷ കാത്തിരിപ്പ് പട്ടികയില്‍ ഉള്‍പ്പെട്ട അപേക്ഷകരില്‍ കോടതിയുടെ അനുകൂല വിധിയുണ്ടായിട്ടും അവസരം നഷ്ടപ്പെടുന്നവര്‍ നിരവധി. കഴിഞ്ഞ ദിവസമാണ് അഞ്ചാം വര്‍ഷം തുടര്‍ച്ചയായി അപേക്ഷ നല്‍കി കാത്തിരിക്കുന്നവരില്‍ 65 വയസ് തികഞ്ഞവര്‍ക്ക് അവസരം നല്‍കി കേന്ദ്ര ഹജ്ജ് കമ്മിറ്റി സീറ്റുകള്‍ അനുവദിച്ചത്.
ഇതുപ്രകാരം കേരളത്തില്‍ 1200ഓളം പേര്‍ക്ക് അവസാന നിമിഷം സീറ്റുകള്‍ ലഭിച്ചു. എന്നാല്‍ കൂടെപ്പോകാന്‍ മെഹ്‌റം ആവശ്യമുള്ള സ്ത്രീകള്‍ക്ക് ഇതു പ്രയോജനപ്പെടുത്താനാകില്ല. നേരത്തെ ഒരു കവറില്‍ നാലുപേര്‍ വീതമാണ് അപേക്ഷ നല്‍കിയിരുന്നത്. ഇതില്‍ ബന്ധുവായ ഒരാളെ മെഹ്‌റമായി സ്വീകരിക്കുകയായിരുന്നു. സ്ത്രീകള്‍ക്കൊപ്പം 65 തികഞ്ഞ പുരുഷന്മാര്‍ മെഹ്‌റമായി ഇല്ലാത്ത അപേക്ഷര്‍ക്ക് അവസരം ലഭിച്ചിട്ടും യാത്രപോകാന്‍ കഴിയാത്ത സ്ഥിതിയാണുള്ളത്.
പരസഹായം ആവശ്യമുള്ള 65 കഴിഞ്ഞ പുരുഷ അപേക്ഷകര്‍ക്കും തീരുമാനത്തിന്റെ ഗുണം ലഭിക്കില്ല. പുതുതായി അവസരം ലഭിച്ചവര്‍ക്ക് അടുത്ത മാസം മുഴുവന്‍ തുകയും അടയ്ക്കാനാണ് നിര്‍ദേശം. 65 കഴിഞ്ഞവരുടെ കവറില്‍ ഉള്‍പ്പെട്ട മറ്റൊരാള്‍ക്കുകൂടി കൂടെപ്പോകാന്‍ അവസരം നല്‍കിയാല്‍ മാത്രമേ ഇവര്‍ക്ക് ഉത്തരവിന്റെ ഗുണം ലഭിക്കുകയുള്ളൂ.