മസ്‌കത്ത്: ഒമാനിലെ ഇ-കൊമേഴ്‌സ് മേഖലയെ കൂടുതല്‍ ക്രമബദ്ധവും വിശ്വാസ്യതയേറിയതുമായ രീതിയില്‍ മുന്നോട്ട് കൊണ്ടുപോകുന്നതിനായി 'മഅറൂഫ് ഒമാന്‍' പ്ലാറ്റ്‌ഫോം കൂടുതല്‍ ശക്തിപ്പെടുത്തിയതായി അധികൃതര്‍ അറിയിച്ചു. രാജ്യത്ത് ഓണ്‍ലൈന്‍ വ്യാപാരം വേഗത്തില്‍ വളരുന്ന സാഹചര്യത്തില്‍ ഉപഭോക്താക്കളും വ്യാപാരികളും തമ്മിലുള്ള വിശ്വാസബന്ധം ഉറപ്പാക്കുകയാണ് ഈ നീക്കത്തിന്റെ പ്രധാന ലക്ഷ്യം.

സോഷ്യല്‍ മീഡിയയിലൂടെയും വെബ്‌സൈറ്റുകളിലൂടെയും അനേകം ഓണ്‍ലൈന്‍ കടകള്‍ പ്രവര്‍ത്തിക്കുന്നതിനാല്‍ യഥാര്‍ത്ഥവും ലൈസന്‍സുള്ളതുമായ വ്യാപാരസ്ഥാപനങ്ങളെ തിരിച്ചറിയുന്നതില്‍ പലപ്പോഴും ഉപഭോക്താക്കള്‍ക്ക് ആശയക്കുഴപ്പം നേരിടാറുണ്ട്. ഈ പശ്ചാത്തലത്തിലാണ് മഅറൂഫ് ഒമാന്‍ കൂടുതല്‍ സജ്ജമാക്കിയത്. പ്ലാറ്റ്‌ഫോമില്‍ രജിസ്റ്റര്‍ ചെയ്യുന്ന വ്യാപാരികളുടെ ലൈസന്‍സ് വിവരങ്ങള്‍ ഉള്‍പ്പെടെ ഔദ്യോഗിക വിവരങ്ങള്‍ പൊതുജനങ്ങള്‍ക്ക് പരിശോധിക്കാനാകും. ഇതിലൂടെ തട്ടിപ്പുകള്‍ കുറയ്ക്കാനും സുരക്ഷിത ഇടപാടുകള്‍ ഉറപ്പാക്കാനും കഴിയുമെന്ന് അധികൃതര്‍ വ്യക്തമാക്കുന്നു.

ഈ മാസം വരെയുള്ള കണക്കുകള്‍ പ്രകാരം ഏകദേശം 340 ഓണ്‍ലൈന്‍ സ്റ്റോറുകള്‍ ഇതിനകം പ്ലാറ്റ്‌ഫോമില്‍ രജിസ്റ്റര്‍ ചെയ്തിട്ടുണ്ട്. കൂടാതെ 670-താളം അപേക്ഷകളും ലഭിച്ചിട്ടുണ്ട്. ചെറുകിട സംരംഭകരെയും വീട്ടുതല സംരംഭങ്ങളെയും നിയമപരമായ സംവിധാനത്തിലേക്ക് എത്തിക്കുകയാണ് ഇതിലൂടെ ലക്ഷ്യമിടുന്നത്. രജിസ്‌ട്രേഷന്‍ ലഭിക്കുന്നത് വ്യാപാരികള്‍ക്ക് കൂടുതല്‍ വിശ്വാസ്യതയും വിപണിയിലെ മത്സരക്ഷമതയും നല്‍കും.

ഇ-കൊമേഴ്‌സ് മേഖലയിലെ നിയന്ത്രണവും സുതാര്യതയും ഉറപ്പാക്കുന്നതിനായി പ്രവര്‍ത്തിക്കുന്ന മിനിസ്റ്ററി ഓഫ് കൊമേഴ്‌സ്,  ഇന്റസ്ട്രി  ആന്റ്  ഇന്‍വെസ്റ്റ്‌മെന്റ്  പ്രൊമോഷന്‍ , ഈ വിപുലീകരണം രാജ്യത്തിന്റെ ഡിജിറ്റല്‍ പരിവര്‍ത്തന പദ്ധതിയുടെ ഭാഗമാണെന്ന് വ്യക്തമാക്കി. സുരക്ഷിതവും നിയമാനുസൃതവുമായ ഓണ്‍ലൈന്‍ വ്യാപാരം രാജ്യത്തിന്റെ സാമ്പത്തിക വളര്‍ച്ചയ്ക്ക് പിന്തുണ നല്‍കുമെന്നും മന്ത്രാലയം ചൂണ്ടിക്കാട്ടി.

ഓണ്‍ലൈന്‍ വഴി സാധനങ്ങള്‍ വാങ്ങുന്നതിനുമുമ്പ് സ്റ്റോറിന്റെ രജിസ്‌ട്രേഷന്‍ സ്ഥിതിവിവരങ്ങള്‍ പരിശോധിക്കണമെന്ന് ഉപഭോക്താക്കളോട് അധികൃതര്‍ നിര്‍ദേശിച്ചിട്ടുണ്ട്. അതേസമയം രജിസ്റ്റര്‍ ചെയ്യാത്ത ഓണ്‍ലൈന്‍ വ്യാപാരികളും ഔദ്യോഗിക സംവിധാനത്തിലേക്ക് എത്തണമെന്ന് ആഹ്വാനവും നല്‍കിയിട്ടുണ്ട്. ഒമാനില്‍ ഇകൊമേഴ്‌സ് രംഗത്തെ വിശ്വാസവും നിലവാരവും ഉയര്‍ത്താനുള്ള മറ്റൊരു ചുവടുവെയ്പ്പായി ഈ നീക്കം വിലയിരുത്തപ്പെടുന്നു.

Oman expands the Ma’ruf Oman platform to strengthen the e-commerce sector, enhance consumer trust, and support licensed online businesses as part of the country’s digital transformation strategy.