തൊടുപുഴ: വിലത്തകര്‍ച്ചയും കാലാവസ്ഥാ വ്യതിയാനവും മൂലം മലയോര കാര്‍ഷിക മേഖല കടുത്ത പ്രതിസന്ധിയില്‍. ഹൈറേഞ്ച് മേഖലയില്‍ ഇതുവരെ വേനല്‍മഴ ലഭിക്കാത്ത പ്രദേശങ്ങളുണ്ട്.
ഉടുമ്പന്‍ചോല താലൂക്കിലെ ശാന്തമ്പാറ, സേനാപതി, രാജകുമാരി മേഖലകളില്‍ കുടിവെള്ളക്ഷാമവും രൂക്ഷമാണ്. ഏലം ഉള്‍പ്പെടെയുള്ള കാര്‍ഷിക വിളകള്‍ ഇവിടെ വ്യാപകമായി ഉണങ്ങി നശിച്ചു.
മൂന്നാര്‍ മേഖലയില്‍ പല ഭാഗത്തും രൂക്ഷമായ മഞ്ഞുവീഴ്ച പ്രധാന വിളയായ തേയിലക്കൃഷി ഉണക്കുകയാണ്. നെടുങ്കണ്ടം, ഇരട്ടയാര്‍ മേഖലകളില്‍ വേനല്‍ മഴയ്‌ക്കൊപ്പം ഐസ് കഷണങ്ങള്‍ കൃഷിയിടത്തില്‍ പതിച്ചതോടെ ലക്ഷങ്ങളുടെ കൃഷിനാശമാണുണ്ടായത്.
വിളനാശത്തിനൊപ്പം ഉല്‍പാദനം ഏറ്റവും കുറവായിരുന്നിട്ടുകൂടി കാര്‍ഷികോല്‍പന്നങ്ങള്‍ക്കു ന്യായമായ വില ലഭിക്കാത്തത് കര്‍ഷകരുടെ പ്രതീക്ഷകളെ തകിടം മറിക്കുന്നു. ആയിരം രൂപ പോലും കിട്ടാതെ ഏലം വില മാസങ്ങളായി മാറ്റമില്ലാതെ തുടരുകയാണ്. കിലോഗ്രാമിന് 950 രൂപ വരെയാണ് ഇപ്പോഴത്തെ ശരാശരി വില.
വിളവെടുപ്പ് സീസണ്‍ അവസാനിച്ചു മാസങ്ങള്‍ പിന്നിട്ടിട്ടും വിലയില്‍ വര്‍ധനയില്ലാത്തതില്‍ കടുത്ത ആശങ്കയുണ്ട്. വില കൂടുമെന്ന പ്രതീക്ഷയില്‍ ഏലം സംഭരിച്ചുവച്ച ചെറുകിട കര്‍ഷകരും വ്യാപാരികളുമാണു ഏറെ പ്രതിസന്ധിയിലായത്. ഹൈറേഞ്ചില്‍ ഏറ്റവുമധികം ഏലം കൃഷി ചെയ്യുന്ന ഉടുമ്പന്‍ചോല താലൂക്കിലെ ചില ഭാഗങ്ങളില്‍ ഇതുവരെ വേനല്‍മഴ ലഭിക്കാത്തത് ഏലം കൃഷിയെ പ്രതികൂലമായി ബാധിച്ചു.
വിലക്കുറവിനൊപ്പം വേനലില്‍ ഉല്‍പാദനത്തിലുണ്ടായ തകര്‍ച്ചയും ജാതിക്കര്‍ഷകരുടെ ദുരിതം ഇരട്ടിയാക്കി. രണ്ടു മാസത്തോളം നീണ്ട മഞ്ഞുവീഴ്ചയാണ് ജാതിക്കൃഷിയുടെ നട്ടെല്ലൊടിച്ചത്.
മൂപ്പെത്താതെ പൊഴിയുന്ന ജാതിക്കായ് ഉണങ്ങിയതിനു 125 രൂപയാണു വപണിയില്‍ വില. പാകമായ ജാതിക്ക് 220 രൂപ വരെയാണു വില ലഭിക്കുന്നത്. ജാതിപത്രിക്കു രൂപഭംഗി അനുസരിച്ച് 850 മുതല്‍ 1100 രൂപ വരെ വില ലഭിക്കുന്നുണ്ട്.
മലയോര കര്‍ഷകരുടെ പ്രധാന വരുമാനമാര്‍ഗവും ഇടവിളയുമായിരുന്ന ഗ്രാമ്പു കൃഷി വേനല്‍ ആരംഭിച്ചതോടെ ഉല്‍പാദനക്കുറവുമൂലം പ്രതിസന്ധിയിലാണ്. കിലോയ്ക്ക് 670 രൂപ വരെ വിലയുണ്ടെങ്കിലും കഴിഞ്ഞ വര്‍ഷത്തെക്കാള്‍ ഉല്‍പാദനം അഞ്ചിലൊന്നായി ചുരുങ്ങിയെന്നാണു കര്‍ഷകര്‍ പറയുന്നത്. കാലാവസ്ഥയിലുണ്ടായ മാറ്റവും രാസവളങ്ങള്‍ മണ്ണിന്റെ ഘടനയിലുണ്ടാക്കിയ വ്യത്യാസവും ഗ്രാമ്പുവിന്റെ ഉല്‍പാദനക്കുറവിനു കാരണമായി കര്‍ഷകര്‍ വിശ്വസിക്കുന്നു.
ഉല്‍പാദനം കുറഞ്ഞ് കൊക്കോ സീസണ്‍ അവസാനിച്ചതോടെ ഒരു മാസത്തിനുള്ളില്‍ കൊക്കോവില അല്‍പം വര്‍ധിച്ചെങ്കിലും കൊക്കോ മരങ്ങള്‍ക്കു രോഗം വ്യാപിച്ചതിനാല്‍ കര്‍ഷകര്‍ ദുരിതത്തില്‍ തന്നെയാണ്. ഉണക്ക കൊക്കോ പരിപ്പിന് കിലോയ്ക്ക് 170 രൂപയും പച്ചപ്പരിപ്പിന് 55 രൂപയുമാണു വില. ഉല്‍പാദനം കുറവുള്ള വേനല്‍ക്കാലത്ത് പച്ചക്കൊളുന്തിനു ന്യായമായ വില ലഭിക്കുന്നില്ലെന്നാണു കര്‍ഷകര്‍ പറയുന്നത്. രണ്ടു മാസം മുമ്പുവരെ കിലോയ്ക്ക് 20 രൂപയ്ക്കാണ് വന്‍കിട കമ്പനികള്‍ കര്‍ഷകരില്‍നിന്നു പച്ചക്കൊളുന്തു ശേഖരിച്ചിരുന്നത്. എന്നാല്‍ ഇപ്പോള്‍ 18 രൂപയാണു വില. മൂന്നു വര്‍ഷം മുമ്പു കിലോയ്ക്ക് 740 രൂപ വിലയുണ്ടായിരുന്ന കുരുമുളകിന്റെ ഇപ്പോഴത്തെ വില 380 രൂപ. കഴിഞ്ഞ ആറു വര്‍ഷത്തിനിടയില്‍ കുരുമുളകുവില ഇത്രയും താഴെയാവുന്നത് ഇതാദ്യം. കാര്‍ഷിക വിളകളുടെ വിലത്തകര്‍ച്ച പിടിച്ചു നിര്‍ത്താന്‍ അധികൃതര്‍ നടപടി സ്വീകരിക്കാത്തതില്‍ പ്രതിഷേധം ശക്തമാണ്.