പെരുമ്പാവൂര്‍: നിര്‍ധനരായ 10 പെണ്‍കുട്ടികളുടെ സമുഹ വിവാഹ ചടങ്ങും പെരുമ്പാവൂര്‍ പ്രവാസി അസോസിയേഷന്‍ ദമ്മാം ഒന്നാം വാര്‍ഷികവും നാളെ പെരുമ്പാവൂര്‍ മുനിസിപ്പല്‍ സ്റ്റേഡിയത്തില്‍ നടക്കും. പ്രദേശത്തെ വിവിധ മതവിഭാഗത്തിലെ തീര്‍ത്തും നിര്‍ധനരെ കണ്ടെത്തിയാണ് പെരുമ്പാവൂരിലെ പ്രവാസി ദമ്മാം മലയാളികള്‍ നാടിന് മാതൃകയാകുന്നത്.
ആറു മാസം മുമ്പ് പ്രവാസി അസോസിയേഷന്‍ വിവിധ മതസംഘടനകള്‍ക്ക് നല്‍കിയ അറിയിപ്പുകളെ തുടര്‍ന്നുള്ള അന്വേഷണത്തിലാണ് നിര്‍ധനരെ കണ്ടെത്തിയത്. ഇവര്‍ക്ക് 10 പവനും വിവാഹ വസ്ത്രവും 10,000 രൂപയുമാണ് നല്‍കുക. വീട്ടുകാര്‍ക്ക് അവരവരുടെ മത ചടങ്ങുകളനുസരിച്ച് സ്വന്തം വീട്ടുകളില്‍ വിവാഹം നടത്താം. തുടര്‍ന്ന് വൈകീട്ട് നാലു മുതല്‍ മുനിസിപ്പല്‍ സ്റ്റേഡിയത്തില്‍ വധു വരന്‍മാരുടെ സത്ക്കാര ചടങ്ങും വാര്‍ഷീകവും കലാ വിരുന്നും സംഘടിപ്പിച്ചിരിക്കുന്നത്.
ചടങ്ങില്‍ മന്ത്രി കെ.ടി ജലീല്‍ മുഖ്യാതിഥിയായിരിക്കും. ചാലക്കുടി എം.പി ഇന്നസെന്റ്, എം.എല്‍.എമാരായ എല്‍ദോസ് കുന്നപ്പിള്ളി, വി.പി സജീന്ദ്രന്‍, അന്‍വര്‍ സാദത്ത് കൂടാതെ രാഷട്രീയ നേതാക്കളായ പി.പി തങ്കച്ചന്‍, ടി.എച്ച് മുസ്തഫ, എന്‍.സി മോഹന്‍, സാജു പോള്‍, സതി ജയകൃഷ്ണന്‍, പെരുമ്പാവുരിലെ പ്രശസ്ത സിനി ആര്‍ട്ടിസ്റ്റുകളായ ജയറാം, ആശാ ശരത്, അനന്യ തുടങ്ങിയവര്‍ പങ്കെടുക്കും. വിവിധ മേഖലകളില്‍ വ്യക്തിമുദ്ര പതിപ്പിച്ച പെരുമ്പാവൂര്‍ സ്വദേശികളെ ചടങ്ങില്‍ ആദരിക്കും.