വെട്ടത്തൂര്‍: ചോര്‍ന്നൊലിക്കുന്ന കെട്ടിടത്തില്‍ ജോലി ചെയ്യേണ്ട അവസ്ഥയിലാണ് വെട്ടത്തൂര്‍ വില്ലേജ് ഓഫീസിലെ ജീവനക്കാര്‍. പഞ്ചായത്തിലെ വെട്ടത്തൂര്‍ വില്ലേജ് ഓഫീസ് കെട്ടിടമാണ് മഴക്കാലമായതോടെ ചോര്‍ന്നൊലിക്കുന്നത്. ആസ്ബസ്റ്റോസ് ഷീറ്റിട്ട കാലപ്പഴക്കം ചെന്ന കെട്ടിടത്തിനുള്ളില്‍ മഴക്കാലമായാല്‍ പിന്നെ വെള്ളം ചോര്‍ന്നൊലിച്ച് ജീവനക്കാര്‍ക്ക് ദുരിതമായി മാറും.
പതിറ്റാണ്ടുകളോളം സുഗമമായി പ്രവര്‍ത്തിച്ചിരുന്ന കെട്ടിടം എട്ടു വര്‍ഷങ്ങള്‍ക്ക് മുന്‍പാണ് കാലപ്പഴക്കത്താല്‍ ശോച്യാവസ്ഥയിലെത്തുന്നത്. വിണ്ടുകീറിയ ഭിത്തികളിലൂടെ മഴവെള്ളം ചോര്‍ന്നൊലിക്കാന്‍ തുടങ്ങിയതോടെ താല്‍ക്കാലിക പരിഹാരമായി ആസ്ബസ്റ്റോസ് ഷീറ്റിട്ട് മേയുകയായിരുന്നു. എന്നാല്‍, സമീപ പ്രദേശങ്ങളിലെ വൃക്ഷങ്ങളില്‍ നിന്നും ശിഖരങ്ങളും മറ്റും ഷീറ്റിന് മുകളിലേക്ക് പൊട്ടിവീഴാന്‍ തുടങ്ങിയതോടെ മഴവന്നാല്‍ ചോര്‍ന്നൊലിക്കുന്നത് നിത്യസംഭവമായിരിക്കുകയാണ്. പൊട്ടിച്ചിതറിയ ആസ്ബസ്റ്റോസ് ഷീറ്റ് നവീകരിക്കാന്‍ യാതൊരു വിധ നടപടികളും നടന്നിട്ടുമില്ല. പ്രശ്‌നത്തിന് പരിഹാരം കണ്ടെത്താന്‍ ബന്ധപ്പെട്ട അധികൃതര്‍ നടപടികള്‍ സ്വീകരിക്കണമെന്നാവശ്യം ശക്തമാവുകയാണ്.