ചെങ്ങന്നൂര്‍: കോളജ് കെട്ടിടത്തിന്റെ മുകളില്‍നിന്നു ചാടിയ വിദ്യാര്‍ഥിനി മരിച്ചു. ചെങ്ങന്നൂര്‍ ക്രിസ്ത്യന്‍ കോളജിലെ ബി.എസ്.സി ബോട്ടണി വിദ്യാര്‍ഥിനി വെണ്മണി യു.കെ ഭവനില്‍ ഉണ്ണികൃഷ്ണന്റെ മകള്‍ ആതിര യു. കൃഷ്ണന്‍  (20) ആണ് മരിച്ചത്. ഇന്നലെ രാവിലെ നാലാം സെമസ്റ്റര്‍ ഇംഗ്ലീഷ് ഇന്റേണല്‍ പരീക്ഷ കഴിഞ്ഞു പുറത്തിറങ്ങി മറ്റു കുട്ടികള്‍ അടുത്ത മലയാളം പരീക്ഷയ്ക്കു തയാറെടുക്കവേയായിരുന്നു സംഭവം.
ജൂബിലി ബ്ലോക്കിന്റെ മുകളില്‍നിന്നാണ് ആതിര താഴേക്കു ചാടിയത്. രാവിലെ 11.45നായിരുന്നു സംഭവം. ബഹളംകേട്ട് ഓടിക്കൂടിയ അധ്യാപകരും മറ്റു വിദ്യാര്‍ഥികളും ചേര്‍ന്ന് ഉടന്‍ മുളക്കുഴയിലെ സ്വകാര്യ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
പരീക്ഷ കഴിഞ്ഞിറങ്ങുമ്പോള്‍ സന്തോഷവതിയായി സംസാരിച്ച ആതിര പഠനത്തിലും മികവുപുലര്‍ത്തിയിരുന്നതായി സഹപാഠികള്‍ പറയുന്നു.
പിതാവ് ഉണ്ണികൃഷ്ണന്‍ വിമുക്തഭടനാണ്. മാതാവ്: ഗീത. സഹോദരി: അഞ്ജലി. മൃതദേഹം മുളക്കുഴയിലെ സ്വകാര്യ ആശുപത്രിയില്‍.