തിരൂരങ്ങാടി: സര്‍ക്കാര്‍ ആശുപത്രിയിലെ ഡോക്ടര്‍മാര്‍ ഭിന്നശേഷിക്കാരെ സാമ്പത്തികമായി ചൂഷണം ചെയ്യുന്നതായി പരാതി. തിരൂരങ്ങാടി താലൂക്ക് ആശുപത്രിയിലെ അസ്ഥിരോഗം, നേത്രവിഭാഗം ഡോക്ടര്‍മാര്‍ക്കെതിരേയാണ് പരാതി. സംസ്ഥാന വികലാംഗ ക്ഷേമ കോര്‍പ്പറേഷന്റെ ശുഭയാത്ര പദ്ധതിയില്‍ ഭിന്നശേഷിക്കാര്‍ക്കായി സര്‍ക്കാര്‍ സൗജന്യമായി നല്‍കുന്ന ഇലക്ട്രോണിക് വീല്‍ചെയറിനായി എത്തുന്നവരില്‍ നിന്നാണ് സാക്ഷ്യപത്രങ്ങളുടെ മറവില്‍ ഡോക്ടര്‍മാര്‍ പണം ഈടാക്കുന്നത്. 80 ശതമാനം മുതല്‍ 90 ശതമാനം വരെ ചലനശേഷി നഷ്ടപ്പെട്ട് വൈകല്യമനുഭവിക്കുന്നവരാണ് സാക്ഷ്യപത്രത്തിനായി ഡോക്ടര്‍മാരെ സമീപിക്കുന്നത്. ഇവരില്‍നിന്ന് സാക്ഷ്യപത്രത്തിന് ഒന്നിന് 100 മുതല്‍ 250 രൂപവരെ ഈടാക്കുന്നതായി അനുഭവസ്ഥര്‍ പറഞ്ഞു.
സാക്ഷ്യപത്രത്തിനായി ഒ.പിയില്‍ പരിശോധന നടത്തുകയായിരുന്ന അസ്ഥിരോഗ വിദഗ്ധനെ സമീപിച്ചപ്പോള്‍ സീല്‍ ഇരിക്കുന്ന സ്ഥലത്തെത്താന്‍ ആവശ്യപ്പെടുകയും നൂറ് രൂപ ചോദിച്ചു വാങ്ങി സീല്‍ ചെയ്ത സാക്ഷ്യപത്രം കൈമാറുകയുമായിരുന്നു. പിന്നീട് സാക്ഷ്യപത്രത്തിനായി നേതൃവിഭാഗം ഡോക്ടറെ സമീപിച്ചപ്പോഴും സ്ഥിതി ഇതുതന്നെ. ദൃശ്യങ്ങള്‍ പ്രാദേശിക ചാനല്‍ പുറത്തുവിട്ടിട്ടുണ്ട്.
വികലാംഗക്ഷേമ കോര്‍പ്പറേഷന് ജനുവരി അഞ്ചിന് മുന്‍പ് അപേക്ഷ സമര്‍പ്പിക്കേണ്ടതിനാല്‍ യഥാസമയം സാക്ഷ്യപത്രം ലഭിക്കുന്നതിന് പണം നല്‍കാന്‍ അപേക്ഷകര്‍ നിര്‍ബന്ധിതരാവുകയാണ്. സംഭവത്തില്‍ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ ജില്ലാ മെഡിക്കല്‍ ഓഫിസര്‍ താലൂക്കാശുപത്രി സൂപ്രണ്ടിന് നിര്‍ദേശം നല്‍കിയിട്ടുണ്ട്.