മണ്ണഞ്ചേരി:കാലവര്‍ഷം തുടങ്ങിയതോടെ ഗ്രാമീണ റോഡുകള്‍ കുളമായി തുടങ്ങി.മഴ കനക്കുന്നതോടെ ഇടറോഡുകളിലൂടെയുള്ള സഞ്ചാരം നാട്ടുകാര്‍ക്ക് ദുസഹമാകും.സമയത്ത് അറ്റകുറ്റപ്പണി നടത്താത്തതാണ് പല റോഡുകളുടെയും പരിതാപകരമായ അവസ്ഥക്ക് കാരണം.കാല വര്‍ഷത്തിന് മുമ്പ് തന്നെ അറ്റക്കുറ്റപ്പണി നടത്തേണ്ട റോഡുകള്‍ അധികൃതര്‍ അവഗണിച്ചു.ചിലയിടങ്ങളില്‍ വഴിപാടുപോലെ ചെറിയ പണികള്‍ മാത്രം നടത്തി അധികൃതര്‍ തടിയൂരി.
എന്നാല്‍ ഇതിന്റെയൊക്കെ തിക്ത ഫലം അനുഭവിക്കേണ്ടത് പൊതുജനമാണ് .മാത്രമല്ല സ്‌കൂള്‍ തുറന്നതോടെ വിദ്യാര്‍ഥികളെയാണ് റോഡുകളുടെ ശോചനീയാവസ്ഥ കൂടുതല്‍ ബാധിക്കുക.കാല്‍ നടയായി പോകുന്ന സാധാരണ വിദ്യാര്‍ഥികള്‍ക്ക് യൂനി ഫോമില്‍ ചെളി പറ്റാതെ സ്‌കൂളിലെത്താനാവില്ല.തെന്നി വീണ് പരിക്കേല്‍ക്കുന്നതും നിത്യ സംഭവമാണ്.സൈക്കിളില്‍ പോകുന്ന വിദ്യാര്‍ഥികളും കുഴികളിലും ചെളിയിലും പുതഞ്ഞു പോകും.
ജില്ലയിലെ ഒട്ടുമിക്ക ഇടറോഡുകളും ഇത്തരത്തില്‍ കുളമായി തുടങ്ങി.അമ്പലപ്പുഴ,നീര്‍ക്കുന്നം,കാക്കാഴം ,വളഞ്ഞ വഴി,തുടങ്ങിയ കിഴക്കും പടിഞ്ഞാറുമുള്ള ഗ്രാമീണ റോഡുകളുടെ സ്ഥിതി പരമ ദയനീയമാണ്.മിക്കതും പേരിന് മാത്രമാണ് റോഡ്.കിഴക്കന്‍ ഭാഗങ്ങളിലെ റോഡുകള്‍ മിക്കതും തോടുകളായി മാറിക്കഴിഞ്ഞിട്ടുണ്ട്.കുട്ടനാട് ഭാഗങ്ങളില്‍ മഴകനത്താല്‍ പിന്നെ റോഡുകളും തോടുകളും തിരിച്ചറിയാന്‍ കഴിയില്ല.
മണ്ണഞ്ചേരി,ആര്യാട്,മാരാരിക്കുളം തെക്ക്,മാരാരിക്കുളം വടക്ക് പഞ്ചായത്തുകളിലെ ഇടറോഡുകളിലൂടെയുള്ള യാത്രദുരിതപൂര്‍ണ്ണമായി. കാലമേറെയായി അറ്റകുറ്റപണികള്‍ നടക്കാത്ത റോഡുകളാണ് കൂടുതല്‍. ്.പൊട്ടിപൊളിഞ്ഞ വലിയകുഴികളില്‍ ആദ്യമഴയ്ക്കുതന്നെ വെള്ളനിറഞ്ഞതാണ് യാത്രാപ്രശ്‌നങ്ങള്‍ക്ക് പ്രധാനകാരണം. ചിലപ്രധാനപാതകളില്‍ അറ്റകുറ്റപണികള്‍ നടത്തിയപ്പോള്‍ ഗ്രാവലിന് പകരം ചെങ്കല്‍പൊടികള്‍ ഉപയോഗിച്ചതുമുലം ഈ റോഡുകളിലെ യാത്രയും പ്രശ്‌നമായി.
ചെങ്കല്‍പൊടിയും മഴവെള്ളവും കൂടികലര്‍ന്നതോടെ ഇരുചക്രവാഹനയാത്രപോലും ഇത്തരം സ്ഥലങ്ങലില്‍ അസാദ്ധ്യമായിതീര്‍ന്നിരിക്കുകയാണ്. രോഗികളേയും പ്രായമായവരെയും ആശുപത്രികളിലും മറ്റ് ആവശ്യങ്ങള്‍ക്കുമായി കൊണ്ടുപോകാന്‍ വാഹനംവിളിച്ചാല്‍ റോഡ്‌മോശമാണ് എന്നകാരണത്താല്‍ ഓട്ടോറിക്ഷകളും ടാക്‌സികളും എത്താത്തത് വാക്കേറ്റങ്ങള്‍ക്കും കാരണമാകുന്നുണ്ട്.