റാസൽഖൈമ: റാസൽഖൈമയിലെ ഒരു ഫാമിൽ റെയ്‌ഡ് നടത്തി ഏകദേശം 7,195 കിലോഗ്രാം നികുതി വെട്ടിച്ച പുകയിലയും പുകയില ഉൽപന്നങ്ങളും പിടിച്ചെടുത്തു. ഇതിന്റെ വിപണി മൂല്യം 12 ദശലക്ഷം ദിർഹം വരും. കുറ്റവാളികളെ സൂക്ഷമായി നിരീക്ഷിക്കുകയും ട്രാക്ക് ചെയ്യുകയും ചെയ്ത ശേഷം, ഫെഡറൽ ടാക്സ് അതോറിറ്റിയുമായി (എഫ്.ടി.എ) സഹകരിച്ച് റാസൽഖൈമയിലെ സാമ്പത്തിക വികസന വകുപ്പ് (ഡി.ഇ.ഡി) അനധികൃത വസ്തുക്കൾ പിടിച്ചെടുക്കുകയായിരുന്നു. എമിറേറ്റിന്റെ തെക്കൻ പ്രദേശങ്ങളിലെ വിവിധ ഫാമുകളിൽ ലൈസൻസില്ലാത്ത പുകയില ഉൽപന്നങ്ങൾ കണ്ടെത്തുന്നതിലേക്ക് നയിച്ച നിരവധി സംയുക്ത കാംപയിനുകൾ അധികാരികൾ നടത്തിയിരുന്നു.

 നിയമ ലംഘകർക്കെതിരെ ആവശ്യമായ നടപടികൾ സ്വീകരിച്ചു. എഫ്.ടി.എ എല്ലാ നിരോധിത വസ്തുക്കളും കണ്ടുകെട്ടി. കുറ്റവാളികളെ നിയമ നടപടികൾക്കായി ജുഡീഷ്യൽ അധികാരികൾക്ക് കൈമാറി. കൂടാതെ, നിയമ വിരുദ്ധ പ്രവർത്തനങ്ങൾ നടത്തുന്ന എല്ലാ വ്യക്തികൾക്കും ഡി.ഇ.ഡി പിഴ ചുമത്തുകയും ചെയ്തു. അന്വേഷണത്തിൽ, ബന്ധപ്പെട്ട അധികാരികളിൽ നിന്ന് ആവശ്യമായ ലൈസൻസില്ലാതെ മാസങ്ങളോളം അനധികൃത കച്ചവടം നടത്തിയതായി ഫാം തൊഴിലാളികൾ സമ്മതിച്ചു.

കൂടുതൽ പരിശോധനയിൽ ഉൾപ്പെട്ട കക്ഷികൾ കാലാവധി കഴിഞ്ഞ പുകയില വസ്തുക്കൾ വിവിധ നിറങ്ങളിലും ചായങ്ങളിലും കലർത്തുന്നതായി കണ്ടെത്തി. ഇത് ഏതെങ്കിലും രൂപത്തിലോ പേരിലോ പുകയില വ്യാപാരം തടയുന്ന ഉപഭോക്ത്യ സംരക്ഷണ നിയമത്തിന്റെ ലംഘനമാണ്.ഉപഭോക്ത്യ അവകാശങ്ങളും സുരക്ഷയും ഉയർത്തിപ്പിടിക്കുന്നതിന് ആവശ്യമായ എല്ലാ നിയമ നടപടികളും സ്വീകരിക്കുന്നതിനുള്ള വകുപ്പിന്റെ പ്രതിജ്ഞാബദ്ധത റാക് ഡി.ഇ.ഡിയിലെ വാണിജ്യ- നിയന്ത്രണ-സംരക്ഷണ വകുപ്പ് മേധാവി ഫൈസൽ അലിയോൺ ഊന്നിപ്പറഞ്ഞു. ഉപഭോക്താക്കളെ സംരക്ഷിക്കുന്നതിനായി കൊമേഴ്സ്യൽ കൺട്രോൾ ടീം വർഷം മുഴുവനും പ്രചാരണം തുടരുമെന്ന് അദ്ദേഹം പൊതുജനങ്ങൾക്ക് ഉറപ്പ് നൽകി.റാക് ഡി.ഇ.ഡി സ്ഥാപിച്ച ഔദ്യോഗിക ആശയ വിനിമയ ചാനലുകളിലുടെ എന്തെങ്കിലും ലംഘനങ്ങൾ നിരീക്ഷിക്കാൻ ഉപഭോക്താക്കളോട് അദ്ദേഹം അഭ്യർഥിച്ചു.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക