ദുബൈ:യു.എ.ഇയുടെ വിവിധ ഭാഗങ്ങളിൽ ഇന്നലെ കനത്ത മഴയ്ക്കൊപ്പം ആലിപ്പഴ വർഷവുമുണ്ടായി. ദേശീയ കാലാവസ്ഥാ വകുപ്പ് (എൻ.സി.എം) വ്യാഴാഴ്ച യെല്ലോ അലർട്ട് പ്രഖ്യാപിച്ചിരു ന്നു. യു.എ.ഇയുടെ കിഴക്കൻ മേഖലയെ കാലാവസ്ഥ ബാധിച്ചു, ഷാർജയുടെ ചില ഭാഗങ്ങളിൽ  ആലിപ്പഴ വർഷമുണ്ടായപ്പോൾ റാസൽഖൈമയിൽ കനത്ത മഴ പെയ്തു. ഇന്നലെ പുലർച്ചെ പല സ്ഥലങ്ങളിലും കനത്ത മഴയുണ്ടായതിനെ തുടർന്ന് പർവത പ്രദേശങ്ങളിൽ വെള്ളച്ചാട്ടങ്ങൾ രൂപപ്പെട്ടു. ഹത്തയിലേക്കുള്ള റോഡിൽ പർവത ഭാഗങ്ങളിൽ വാഹനമോടിച്ചവർക്ക് വെള്ളച്ചാട്ടങ്ങൾ മനം കവർന്ന കാഴ്ചയായി.

അതിനിടെ, അടുത്ത ആഴ്‌ചയിൽ ഉഷ്ണ മേഖലാ ന്യൂനമർദമുണ്ടാകുമെന്ന് എൻ.സി.എം പ്രതീക്ഷിക്കുന്നതായി അറിയിച്ചു. ന്യൂനമർദ സംവിധാനത്തിൻ്റെ സാന്നിധ്യം നിലവിൽ നിരീക്ഷിച്ചു വരികയാണെന്നും അധികൃതർ പറഞ്ഞു. ഇന്ത്യയുടെ പടിഞ്ഞാറൻ തീരത്തോട് ചേർന്ന് അറബിക്കടലിന് തെക്ക് ഭാഗത്തുള്ള ന്യൂനമർദത്തെക്കുറിച്ചു എൻ.സി.എം യു.എ.ഇ നിവാസികൾക്ക് മുന്നറിയിപ്പ് നൽകി. 

ഇത് മധ്യഅറബിക്കടലിലേക്ക് നീങ്ങുകയും ഒക്ടോബർ 14, 15 തീയതികളിൽ ശക്തി പ്രാപിക്കുകയും ചെയ്യും. ഉഷ്ണ മേഖലാ പ്രതിഭാസങ്ങൾ പലപ്പോഴും ദ്രുതഗതിയിലുള്ളതും പെട്ടെന്നുള്ളതുമായ മാറ്റങ്ങൾക്ക് വിധേയമാകാറുണ്ട്. കാലാവസ്ഥാ മാറ്റം അപ്പപ്പോൾ അപ്ഡേറ്റ് ചെയ്യുമെന്നും ബന്ധപ്പെട്ടവർ വ്യക്തമാക്കി.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക