തെഹ്‌റാന്‍: ഇറാഖില്‍ യു.എസിന്റെ തന്ത്രപ്രധാനമായ സൈനിക താവളങ്ങളില്‍ ഇറാന്‍ നടത്തിയ ബാലിസ്റ്റിക് മിസൈല്‍ ആക്രമണത്തിന്റെ കൂടുതല്‍ തെളിവുകള്‍ പുറത്ത്. ആക്രമണത്തിന് മുന്‍പും ശേഷവുമുള്ള സൈനിക താവളങ്ങളുടെ സാറ്റലൈറ്റ് ദൃശ്യങ്ങളാണ് പുറത്തുവന്നിരിക്കുന്നത്.
രണ്ടു സൈനിക താവളങ്ങള്‍ക്കും കേടുപാടുകള്‍ പറ്റിയത് ദൃശ്യങ്ങളില്‍ വ്യക്തമാവുന്നുണ്ട്. ഇറാഖിലെ അന്‍ബര്‍ പ്രവിശ്യയിലെ അല്‍ അസദ് സൈനിക താവളവും കുര്‍ദിസ്ഥാനിലെ ഇര്‍ബിലിലെ മറ്റൊരു സൈനിക കേന്ദ്രവുമായിരുന്നു ഇറാന്‍ ആക്രമിച്ചത്. ആക്രമണം നടന്ന സൈനിക താവളങ്ങളില്‍ സൈനികര്‍ ഉണ്ടായിരുന്നില്ലെന്നും ചെറിയ കേടുപാടുകള്‍ മാത്രമേ സംഭവിച്ചിട്ടുള്ളൂ എന്നുമാണ് യു.എസ് വ്യക്തമാക്കിയിരുന്നത്. എന്നാല്‍ ആക്രമണത്തില്‍ 80 സൈനികര്‍ കൊല്ലപ്പെട്ടതായി ഇറാന്‍ വ്യക്തമാക്കിയിരുന്നു