നാദാപുരം: അര്‍ഹമായ അവധികള്‍ പോലും എടുക്കാതെ കഴിഞ്ഞ വര്‍ഷം സ്മരണീയമാക്കിയ സന്തോഷത്തിലാണ് നാദാപുരം ഗവ. യു.പി സ്‌കൂളിലെ സി.പി വിനോദന്‍.
അധ്യയന, അവധി ദിനങ്ങളില്‍ സ്‌കൂളിലെത്തി എല്ലാ കാര്യങ്ങളിലും സജീവമായി പ്രവര്‍ത്തിക്കാനും അദ്ദേഹം മടി കാണിച്ചില്ല. അത്യാവശ്യ സമയങ്ങളില്‍ എടുക്കാനുള്ള 15 ലീവിന് പുറമേ ഭിന്നശേഷിക്കാര്‍ക്ക് അനുവദിച്ച സ്‌പെഷല്‍ ലീവും ഉണ്ടെന്നിരിക്കെയാണ് ഒരു അവധി പോലും എടുക്കാതെ സ്‌കൂളിലെ ഐ.ടി പഠനകാര്യങ്ങള്‍ക്ക് നേതൃത്വം നല്‍കുന്ന ഈ അധ്യാപകന്‍ ഒരു വര്‍ഷം പൂര്‍ത്തിയാക്കിയത്.
സംസ്ഥാന പാഠപുസ്തക പരിഷ്‌കരണ കമ്മിറ്റി, സ്റ്റേറ്റ് ഐ.സി.ടി കമ്മിറ്റി എന്നിവയില്‍ അംഗമാണ്. സ്‌കൂളില്‍ നടന്ന ചടങ്ങില്‍ സഹപ്രവര്‍ത്തകര്‍ വിനോദനെ അനുമോദിച്ചു. പ്രധാനാധ്യാപകന്‍ പി.സി മൊയ്തു, കെ.കെ രമേശന്‍ സംസാരിച്ചു.