ചെറുപുഴ: ചെറുപുഴ-കമ്പിപ്പാലം റോഡില്‍ നടപ്പാത കൈയേറി നിര്‍മാണ പ്രവര്‍ത്തനം. ഹര്‍ത്താല്‍ ദിനത്തിലാണു കാല്‍നട യാത്രക്കാര്‍ക്കു നടന്നുപോകാനും മലിനജലം ഒഴുകിപ്പോകാനുമായി നിര്‍മിച്ച ഫുട്പാത്തിനു മുകളില്‍ കോണ്‍ക്രീറ്റ് ചെയ്തു നിര്‍മാണ പ്രവര്‍ത്തനം നടത്തിയത്. കമ്പിപ്പാലം റോഡിലെ ഒരു കടയുടെ മുന്‍പിലാണു അനധികൃത നിര്‍മാണം. വീതി കുറഞ്ഞ കമ്പിപ്പാലം റോഡിലൂടെ വാഹനങ്ങള്‍ കടന്നുപോകുന്നതു തന്നെ ഏറെ ബുദ്ധിമുട്ടിയാണ്. കാസര്‍കോട് ജില്ലയില്‍ നിന്നുമുള്ള നിരവധി ആളുകള്‍ കമ്പിപ്പാലം റോഡിലൂടെയാണു ചെറുപുഴ ബസ് സ്റ്റാന്‍ഡിലെത്തുന്നത്. നടപ്പാതയില്‍ നിന്ന് ഒരടിയോളം ഉയരത്തിലാണ് അനധികൃതമായി കോണ്‍ക്രീറ്റ് ചെയ്തത്.
ഇതുവഴി കാല്‍നട ചെയ്യുന്നവര്‍ അപകടത്തില്‍പ്പെടാനുള്ള സാധ്യതയും ഏറെയാണ്. ചെറുപുഴ ടൗണില്‍ നടന്ന പല അനധികൃത നിര്‍മാണ പ്രവര്‍ത്തനങ്ങള്‍ക്കുമെതിരേ പരാതി ഉയര്‍ന്നിരുന്നെങ്കിലും അധികൃതര്‍ ഇതുവരെ യാതൊരു നടപടിയും എടുത്തിട്ടില്ല. അനധികൃത കൈയേറ്റങ്ങള്‍ പൊളിച്ചുനീക്കാന്‍ അടിയന്തര നടപടി സ്വീകരിക്കണമെന്നാണു നാട്ടുകാരുടെ ആവശ്യം.