ന്യൂഡല്‍ഹി: പൗരത്വ നിയമ ഭേദഗതിയെ ചോദ്യം ചെയ്ത് കേരളം സുപ്രിം കോടതിയെ സമീപിച്ചതിനു പിന്നാലെ, 2008ലെ എന്‍.ഐ.എ നിയമത്തെ ചോദ്യം ചെയ്ത് ഛത്തീസ്ഗഢ് സുപ്രിം കോടതിയെ സമീപിച്ചു. ഈ നിയമം പാര്‍ലമെന്റിന്റെ അധികാര പരിധിക്ക് പുറത്തുള്ളതും ഭരണഘടനയുടെ ഫെഡറല്‍ തത്വങ്ങള്‍ക്കു വിരുദ്ധവുമാണെന്നാണ് ചത്തീസ്ഗഢ് ഹരജിയില്‍ ചൂണ്ടിക്കാട്ടുന്നത്.
സംസ്ഥാനങ്ങളുടെ അനുമതിയില്ലാതെ കേസുകള്‍ ഏറ്റെടുക്കാന്‍ എന്‍.ഐ.എക്ക് അധികാരം നല്‍കുന്ന വ്യവസ്ഥയെയാണ് പ്രധാനമായും ചോദ്യം ചെയ്തിരിക്കുന്നത്. നിയമം ഭരണഘടനാ വിരുദ്ധമാണെന്ന് പ്രഖ്യാപിക്കണമെന്നും ഹരജി ആവശ്യപ്പെടുന്നു. 2008ല്‍ കോണ്‍ഗ്രസ് നേതൃത്വത്തിലുള്ള യു.പി.എ സര്‍ക്കാരാണ് എന്‍.ഐ.എ നിയമം കൊണ്ടുവന്നത്. ഇതിനെയാണ് കോണ്‍ഗ്രസ് തന്നെ ഭരിക്കുന്ന സംസ്ഥാനം ചോദ്യം ചെയ്തിരിക്കുന്നത്. എന്‍.ഐ.എയുടെ ഇടപെടല്‍ സംസ്ഥാനങ്ങളും കേന്ദ്രവും തമ്മിലുള്ള ബന്ധത്തിന് വിള്ളലുണ്ടാക്കാന്‍ കാരണമാകുന്നുണ്ടെന്നും ഹരജിയില്‍ ചൂണ്ടിക്കാട്ടുന്നു.