ന്യൂഡല്‍ഹി: ഐ.എസ്.ആര്‍.ഒ ചാരക്കേസ് അന്തിമവാദത്തിനായി സുപ്രിംകോടതി ഏപ്രിലിലേക്കു മാറ്റി. കേസില്‍ എതിര്‍സത്യവാങ്മൂലം നല്‍കുന്നതിന് പ്രതിഭാഗം കൂടുതല്‍ സമയം ആവശ്യപ്പെട്ടതിനെ തുടര്‍ന്നാണ് ജസ്റ്റിസ് ദീപക് മിശ്ര അധ്യക്ഷനായ ബെഞ്ചിന്റെ നടപടി.
ചാരക്കേസ് അന്വേഷിച്ച കേരളാ മുന്‍ ഡി.ജി.പി സിബി മാത്യൂസ്, കെ.കെ ജോഷ്വ, എസ്. വിജയന്‍ എന്നീ പൊലിസ് ഉദ്യോഗസ്ഥര്‍ക്കെതിരേ നടപടി വേണമെന്നാവശ്യപ്പെട്ട് ഐ.എസ്.ആര്‍.ഒയിലെ മുന്‍ ശാസ്ത്രജ്ഞന്‍ നമ്പി നാരായണന്‍ ആണ് സുപ്രിംകോടതിയെ സമീപിച്ചത്. ഹരജി പരിഗണിച്ച സുപ്രിംകോടതി, ഇക്കാര്യത്തില്‍ മറുപടി നല്‍കണമെന്നാവശ്യപ്പെട്ട് 2015 ജൂലൈയില്‍ സിബി മാത്യൂസ് ഉള്‍പ്പെടെയുള്ളവര്‍ക്ക് നോട്ടീസയച്ചിരുന്നു. ഇതിന് മറുപടി നല്‍കാന്‍ സാവകാശം വേണമെന്ന സിബി മാത്യൂസിന്റെ ആവശ്യം കോടതി തള്ളിയിരുന്നു. എന്നാല്‍ ഇന്നലെ കേസ് പരിഗണിച്ചപ്പോള്‍, വിശദീകരണം നല്‍കാന്‍ കൂടുതല്‍ സമയം വേണമെന്ന് സിബി മാത്യൂസിനു വേണ്ടി ഹാജരായ മുതിര്‍ന്ന അഭിഭാഷകന്‍ പ്രശാന്ത് ഭൂഷണ്‍ ആവശ്യപ്പെട്ടു. ഈയാവശ്യം ദീപക് മിശ്രയുടെ ബെഞ്ച് അനുവദിക്കുകയായിരുന്നു.
ഏപ്രില്‍ രണ്ടാംവാരം കേസ് പരിഗണിക്കുമെന്നും അപ്പോള്‍ ഹരജിയില്‍ വിശദമായി വാദംകേള്‍ക്കുമെന്നും മൂന്നംഗബെഞ്ച് അറിയിച്ചു. ജസ്റ്റിസുമാരായ എ.എം. ഖന്‍വില്‍ക്കര്‍, എം. ശാന്തനഗൗഡര്‍ എന്നിവരാണ് ബെഞ്ചിലെ മറ്റംഗങ്ങള്‍.