ജിദ്ദ: വിശുദ്ധമാസത്തിലെ ദിനരാത്രങ്ങള്‍ സുകൃതങ്ങള്‍ കൊണ്ട് സജീവമാക്കണമെന്ന് ഇരു ഹറമുകളിലെയും ഇമാമുമാര്‍. റമദാനിലെ ആദ്യ വെള്ളിയാഴ്ച വിശ്വാസികളെ അഭിസംബോധന ചെയ്യുകയായിരുന്നു ഇവര്‍. ലക്ഷക്കണക്കിന് വിശ്വാസികളാണ് ഇരു ഹറമുകളിലും ഇന്നലെ ജുമുഅക്കെത്തിയത്. വ്യാഴാഴ്ച തന്നെ ഹറമുകളില്‍ വിശ്വാസികളുടെ തിരക്ക് അനുഭവപ്പെട്ടിരുന്നു. മുന്‍ വര്‍ഷങ്ങളിലേക്കാള്‍ തിരക്കാണ് ഇത്തവണ അനുഭവപ്പെട്ടതെന്ന് ഹറം ജീവനക്കാര്‍ പറഞ്ഞു. റമദാനിലെ രാത്രികാലത്തെ പ്രത്യേക നിസ്്കാരമായ തറാവീഹിനും ലക്ഷങ്ങളാണ് പങ്കെടുക്കുന്നത്. പ്രായംചെന്ന തീര്‍ഥാടകര്‍ക്ക് പ്രത്യേക സുരക്ഷാസംവിധാനങ്ങള്‍ ഒരുക്കിയിരുന്നു. സുരക്ഷാ ഉദ്യോഗസ്ഥര്‍ക്ക് പുറമെ മക്ക വിദ്യാഭ്യാസ മന്ത്രാലയത്തിന്റെ കീഴിലുള്ള 700 ല്‍പരം വിദ്യാര്‍ഥികള്‍ അടങ്ങുന്ന സ്‌കൗട്ട് സംഘവും തീര്‍ഥാടകരുടെ സേവനത്തിന് മുന്നിട്ടിറങ്ങി. അവശരായവര്‍ക്ക് പത്തു ഗോള്‍ഫ് വണ്ടികളും ഒരുക്കിയിരുന്നു. ഗോള്‍ഫ് വണ്ടികളുടെ സേവനം തീര്‍ഥാടകര്‍ക്ക് മുഴുവന്‍ സമയവും ലഭിക്കുമെന്നും ഹറം സേവനസംഘം അറിയിച്ചു.
മദീനയില്‍ തീര്‍ഥാടകരുടെ സൗകര്യാര്‍ഥം മസ്ജുദുന്നബവിയിലും പരിസരത്തും സുരക്ഷാ സൈനികരുടെ എണ്ണം വര്‍ധിപ്പിച്ചിരുന്നു. അവശ്യസഹായത്തിന് റെഡ് ക്രസന്റ് സേനാ യൂനിറ്റുകളെയും സജ്ജമാക്കിയിട്ടുണ്ട്. വരുംദിവസങ്ങളില്‍ കൂടുതല്‍ തീര്‍ഥാടകര്‍ എത്തുന്ന പശ്ചാത്തലത്തില്‍ ഗതാഗത നിയന്ത്രണത്തിന് 15,000 സുരക്ഷാ ഉദ്യോഗസ്ഥരെ നിയോഗിച്ചതായി മദീന പ്രവിശ്യാ പൊലിസ് മേധാവി മേജര്‍ ജനറല്‍ അബ്ദുല്‍ ഹാദി ബിന്‍ ദര്‍ഹം അല്‍ശഹ്‌റാനി അറിയിച്ചു. തീര്‍ഥാടകര്‍ക്കുള്ള നോമ്പുതുറ സൗകര്യവും ഇരു ഹറമുകളിലും ഒരുക്കിയിട്ടുണ്ട്.