ട്രിപ്പോളി: തീവ്രവാദ ഗ്രൂപ്പുകളില്‍ ചേരുന്നത് തടയാന്‍ അനുവാദം കൂടാതെയുള്ള വിദേശ യാത്രാ നിരോധനമെര്‍പ്പെടുത്തി കിഴക്കന്‍ ലിബിയ. 18 വയസു മുതല്‍ 45 വയസു വരെയുള്ള സ്ത്രീ-പുരുഷന്‍മാര്‍ക്കാണ് യാത്രാ നിരോധനം.

ജനങ്ങളെ തീവ്രവാദത്തില്‍ നിന്ന് തടയുകയാണ് യാത്രാ നിരോധനത്തിനു പിന്നിലുള്ള ലക്ഷ്യമെന്ന് കിഴക്കന്‍ ലിബിയന്‍ പട്ടാള മേധാവി അബ്ദുല്‍റസാഖ് അല്‍ നദൂരി പറഞ്ഞു. ലിബിയയുടെ വടക്കു കിഴക്കന്‍ ഭാഗങ്ങളില്‍ ശത്രുതാപരമായ ഭരണമാണ് നടന്നുക്കൊണ്ടിരിക്കുന്നത്. ലിബിയയുടെ മിക്ക ഭാഗങ്ങളും പട്ടാള നിയന്ത്രണത്തിലാണ്. നേരത്തേ, കുറച്ച് ദിവസങ്ങള്‍ക്ക് മുന്‍പ് 60 വയസിനു താഴെയുള്ള സ്ത്രീകള്‍ക്ക് ഒരു പുരുഷ പങ്കാളിയെ കൂടതെയുള്ള യാത്രക്ക് ഇവിടെ നിരോധനം ഏര്‍പ്പെടുത്തിയിരുന്നു. അത് പെട്ടെന്ന് തന്നെ പിന്‍വലിക്കുകയും ചെയ്തിരുന്നു.

അതിനു ശേഷമാണ് സ്ത്രീക്കും പുരുഷനും ഒരു പോലെ ബാധകമാകുന്ന ഈ വിധി പുറപ്പെടുവിക്കുന്നത്.ഓരോ പ്രവിശ്യയിലുമുള്ള അധികാരികള്‍ മറ്റു പ്രവിശ്യയിലെ അധികാരികളെ അംഗീകരിക്കില്ല എന്നതുകൊണ്ട് തന്നെ ഇൗ നിയമം രാജ്യത്തെ മറ്റു ഭാഗങ്ങളിലുള്ളവരെയും പ്രതികൂലമായി ബാധിക്കും.

പുതിയ നിയമത്തിലൂടെ യാത്ര ചെയ്യാന്‍ ഉദ്ദേശിക്കുന്ന എല്ലാവര്‍ക്കും അനുവാദം നല്‍കാന്‍ പട്ടാളത്തിനും ആഭ്യന്തര വകുപ്പിനും ബാധ്യതയുണ്ടാവും. എന്നാല്‍ യാത്രക്ക് അനുവാദം നല്‍കാന്‍ എന്തായിരിക്കും മാനദണ്ഡം എന്നത് വ്യക്തമല്ല.
മുഅമ്മര്‍ ഖദ്ദാഫിയുടെ മരണത്തിന് ശേഷം ലിബിയയില്‍ തുടര്‍ന്നുക്കൊണ്ടിരിക്കുന്ന പട്ടാള മേധാവിത്വത്തിന്റെ പ്രതിഫലനങ്ങളാണ് ഇവയെല്ലാം എന്നാണ് നിരീക്ഷിക്കപ്പെടുന്നത്.