മുംബൈ: ബ്രിഹാന്‍ മുംബൈ കോര്‍പ്പറേഷന്‍(ബി.എം.സി) ഭരിക്കുന്നതിനായി ശിവസേന നീക്കം തുടങ്ങി. നിവൃത്തിയില്ലാത്തതുകൊണ്ട് ശിവസേനയുമായി നീക്കുപോക്കുണ്ടാക്കുമെന്ന ബി.ജെ.പി നേതാവും കേന്ദ്ര മന്ത്രിയുമായ നിതിന്‍ ഗഡ്കരി കഴിഞ്ഞ ദിവസം വ്യക്തമാക്കിയിതിന് തൊട്ടുപിന്നാലെ ഏത് തരത്തിലും ബി.ജെ.പിയെ അകറ്റി നിര്‍ത്തി ഭരണം നടത്താനാണ് ശിവസേന പദ്ധതി തയാറാക്കുന്നത്. ഇതിന്റെ ഭാഗമായി കോണ്‍ഗ്രസുമായും മറ്റ് സ്വതന്ത്രരുമായും ശിവസേനാ അധ്യക്ഷന്‍ ഉദ്ധവ് താക്കറെ ചര്‍ച്ച തുടങ്ങിയിട്ടുണ്ട്.
സ്വതന്ത്രനായി വിജയിച്ച കിരന്‍ ലാന്‍ജെ ഇന്നലെ ശിവസേനക്ക് പിന്തുണ പ്രഖ്യാപിച്ചിട്ടുണ്ട്.
ശിവസേനാ ആസ്ഥാനത്തെത്തിയാണ് അദ്ദേഹം ഉദ്ധവ് താക്കറെയുമായി ചര്‍ച്ച നടത്തി പിന്തുണ പ്രഖ്യാപിച്ചത്. സ്വതന്ത്രരായി വിജയിച്ച ചങ്‌സെ മുള്‍ത്താനി, സ്‌നേഹല്‍ മോര്‍, തുളസിദാസ് ഷിന്‍ഡെ എന്നിവര്‍ നേരത്തെ തന്നെ ശിവസേനക്ക് പിന്തുണ പ്രഖ്യാപിച്ചിരുന്നു.
84 സീറ്റുകളില്‍ വിജയിച്ച ശിവസേനക്ക് നാല് സ്വതന്ത്രര്‍ പിന്തുണ പ്രഖ്യാപിച്ചതോടെ അംഗസംഖ്യ 88 ആയിട്ടുണ്ട്. 227 അംഗങ്ങളുള്ള കോര്‍പ്പറേഷനില്‍ ഭരിക്കാന്‍ 114 അംഗങ്ങളുടെ പിന്തുണ വേണം. ഇതിനായി 31 അംഗങ്ങളുള്ള കോണ്‍ഗ്രസുമായും ശിവസേന ചര്‍ച്ച തുടങ്ങിയിട്ടുണ്ട്.
എന്നാല്‍ ശിവസേനയുമായുള്ള ചര്‍ച്ചയെ മുതിര്‍ന്ന കോണ്‍ഗ്രസ് നേതാവ് ഗുരുദാസ് കാമത്ത് ശക്തമായി എതിര്‍ത്തിട്ടുണ്ട്. നേരിട്ടോ അല്ലാതെയോ ഉള്ള ഏതൊരു ബന്ധത്തെയും താന്‍ ശക്തമായി എതിര്‍ക്കുന്നുവെന്ന് കാണിച്ച് അദ്ദേഹം സംസ്ഥാന കോണ്‍ഗ്രസ് നേതൃത്വത്തിന് കത്ത് നല്‍കിയിട്ടുണ്ട്.