കാബൂള്‍: അഫ്ഗാനിസ്ഥാനില്‍ ഭഗ്ലാന്‍ പ്രവിശ്യയിലെ പുലെ ഖുമരി പൊലിസ് കേന്ദ്രത്തില്‍ താലിബാന്‍ നടത്തിയ ആക്രമണത്തില്‍ 11 പൊലിസ് ഓഫിസര്‍മാര്‍ കൊല്ലപ്പെട്ടു. ആറുപേര്‍ക്കു പരുക്കേറ്റു. അതേസമയം, 17 പേര്‍ കൊല്ലപ്പെട്ടതായി താലിബാന്‍ വക്താവ് സബീഉല്ല മുജാഹിദ് അവകാശപ്പെട്ടു.
ഒരു ഓഫിസറെ ബന്ദിയാക്കിയതായും അദ്ദേഹം പറഞ്ഞു. ഗസ്‌നി പ്രവിശ്യയില്‍ താലിബാന്‍ യു.എസ് സൈനിക വിമാനം വെടിവച്ചു വീഴ്ത്തിയെന്ന അവകാശവാദത്തിനിടെയാണ് പുതിയ ആക്രമണം. അഫ്ഗാനിലെ യു.എസ്, നാറ്റോ സൈനികര്‍ക്കു നേരെ താലിബാന്‍ ആക്രമണം നടത്തുന്നത് പതിവാണ്. കഴിഞ്ഞ ജൂലൈയില്‍ കണ്ഡഹാറില്‍ ഒരു അഫ്ഗാന്‍ സൈനികന്‍ രണ്ടു യു.എസ് സൈനികരെ വെടിവച്ചുകൊന്നിരുന്നു. സെപ്റ്റംബറില്‍ മൂന്നു യു.എസ് സൈനികര്‍ക്കു പരുക്കേറ്റത് അഫ്ഗാന്‍ സിവില്‍ പൊലിസുകാരന്റെ വെടിയേറ്റായിരുന്നു. താലിബാന്റെ ശക്തികേന്ദ്രമാണ് ഭഗ്ലാന്‍.