തിരുവനന്തപുരം: സംസ്ഥാനത്ത് മണല്‍വാരല്‍ നിരോധനം നിലനില്‍ക്കെ നിയമം ലംഘിച്ചവരില്‍ നിന്നും അഞ്ച് ലക്ഷം രൂപവരെ പിഴ ഈടാക്കാന്‍ സര്‍ക്കാര്‍ തീരുമാനം. ഇതുസംബന്ധിച്ച കരട് ബില്‍ മന്ത്രിസഭ അംഗീകരിച്ചു. നിലവില്‍ 25000 രൂപയായിരുന്നു പിഴയായി ഈടാക്കിയിരുന്നത്.

തുടര്‍ച്ചയായ നിയമലംഘനത്തിന് അധികമായി ചുമത്തുന്ന പിഴ 1000 രൂപയില്‍ നിന്ന് 50000 രൂപയായി വര്‍ധിപ്പിക്കും. നിലവിലുള്ള നിയമപ്രകാരം പിടിച്ചെടുക്കുന്ന മണല്‍ പൊതുമരാമത്ത് വകുപ്പ് നിശ്ചയിക്കുന്ന നിരക്കില്‍ നിര്‍മിതി കേന്ദ്രത്തിന് വില്‍ക്കേണ്ടതാണ്. അത് മാറ്റി കണ്ടുകെട്ടിയ മണലിന്റെ മതിപ്പുവില ജില്ലാ കലക്ടര്‍ നിശ്ചിയിച്ചുകൊണ്ട് വ്യക്തികള്‍ക്കോ സ്ഥാപനങ്ങള്‍ക്കോ ലേലത്തിലൂടെ വില്‍പന നടത്താന്‍ പുതിയ ബില്ലില്‍ വ്യവസ്ത ചെയ്യുന്നുണ്ട്.