കുവൈത്ത് സിറ്റി: കഴിഞ്ഞ 33 വര്‍ഷത്തിനിടെ കുവൈത്തില്‍ നിന്ന് 5,95,000 പേരെ നാടുകടത്തിയതായി ആഭ്യന്തര മന്ത്രാലയത്തിലെ ഡിപ്പോര്‍റ്റേഷന്‍ വകുപ്പ് ഡയറക്ടര്‍ ബ്രിഗേഡിയര്‍ ജാസിം അല്‍ മിസ്ബാഹ് പറഞ്ഞു. ഇതില്‍ 354,168 പേര്‍ പുരുഷന്മാരും, 230,441 പേര്‍ സ്ത്രീകളും, 10,602 കുടുംബങ്ങളും ഉള്‍പ്പെടുന്നു. 

ആഭ്യന്തര മന്ത്രാലയത്തിന്റെ വിവിധ മേഖലകളില്‍ നിന്ന് റഫര്‍ ചെയ്യപ്പെടുന്ന വ്യക്തികള്‍ക്കായി മൂന്ന് ദിവസത്തിനുള്ളില്‍ നടപടിക്രമങ്ങള്‍ പൂര്‍ത്തിയാക്കാനുള്ള ശ്രമങ്ങള്‍ തുടങ്ങിയതോടെ നാടുകടത്തല്‍ പ്രക്രിയ കൂടുതല്‍ കാര്യക്ഷമമായതായി ബ്രിഗേഡിയര്‍ അല്‍ മിസ്ബ ഒരു അഭിമുഖത്തില്‍ വെളിപ്പെടുത്തി. 42,000 പ്രവാസികളെയാണ് കഴിഞ്ഞ വര്‍ഷം മാത്രം നാടുകടത്തിയത്. അതേസമയം 2024 മുതല്‍ 25,000 പേരെ കൂടി അയച്ചു.

നാടുകടത്തപ്പെട്ടവര്‍ക്ക് വിമാന ടിക്കറ്റ് നല്‍കാനുള്ള ഉത്തരവാദിത്തം സ്‌പോണ്‍സര്‍മാരുടേതാണ്. ടിക്കറ്റ് റിസര്‍വേഷനും പുറപ്പെടാനുള്ള നടപടിക്രമങ്ങളും വേഗത്തിലാക്കാന്‍ ഡിപോര്‍ട്ടേഷന്‍ ഡിപ്പാര്‍ട്ട്‌മെന്റിന്റെ കെട്ടിടത്തിലെ രണ്ട് ട്രാവല്‍ ഓഫീസുകള്‍ വഴി മന്ത്രാലയം സഹായം വാഗ്ദാനം ചെയ്യുന്നുണ്ടെന്നും അദ്ദേഹം പറഞ്ഞു. നാടുകടത്തലിന് അനുമതി ലഭിച്ചു കഴിഞ്ഞാല്‍, വ്യക്തികളുടെ വിരലടയാളം രേഖപ്പെടുത്തുകയും മറ്റു നടപടികള്‍ പൂര്‍ത്തിയാക്കുകയും ചെയ്യും, കൂടാതെ കുവൈത്ത് അന്താരാഷ്ട്ര വിമാനത്താവളത്തിലേക്കുള്ള അവരുടെ യാത്ര കര്‍ശന സുരക്ഷയിലാണെന്നും അദ്ദേഹം വ്യക്തമാക്കി.

Kuwait deports a staggering 42,000 expatriates in a single year, highlighting stringent immigration policies and rising scrutiny on foreign workers in the Gulf nation.