അരീക്കോട്: കിഴുപറമ്പ് പഞ്ചായത്തിലെ പഴംപറമ്പില്‍ പ്രവര്‍ത്തിക്കുന്ന കാഴ്ചയില്ലാത്തവരുടെ അഗതി മന്ദിരത്തിന്റെ ഏഴാം വാര്‍ഷികാഘോഷം വിവിധ പരിപാടികളോടെ സമാപിച്ചു. അകക്കണ്ണാല്‍ ജീവിതം നയിക്കുന്നവരോടൊപ്പം സൗഹൃദ സായാഹനം കൂടാനും കലാപരിപാടികള്‍ ആസ്വദിക്കാനും നിരവധി പേരാണെത്തിയത്.
പരിപാടിയുടെ ഭാഗമായി സംഘടിപ്പിച്ച സാംസ്‌കാരിക സമ്മേളനം ജില്ലാപഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ ഉദ്ഘാടനം ചെയ്തു. കാഴ്ചയില്ലാത്തവരായ വനിതകള്‍ക്കുള്ള ഹോസ്റ്റല്‍ നിര്‍മിച്ചുനല്‍കുമെന്ന് അദ്ദേഹം പറഞ്ഞു. പി.കെ കമ്മദ് കുട്ടി ഹാജി അധ്യക്ഷനായി. ജില്ലാപഞ്ചായത്ത് സ്ഥിരംസമിതി അധ്യക്ഷന്‍ ഉമ്മര്‍ അറക്കല്‍, ബ്ലോക്ക് പഞ്ചായത്ത് പ്രസിഡന്റ് പറമ്പന്‍ ലക്ഷ്മി, ഇസ്മാഈല്‍ മുത്തേടം, കാഞ്ചന കൊറ്റങ്ങല്‍, കെ. അബ്ദുല്‍ അസീസ്, ഹമീദ് കുനിയില്‍, കെ.സി.എ ശുക്കൂര്‍, എം.എം മുഹമ്മദ്, നജീബ് കാരങ്ങാടന്‍ സംബന്ധിച്ചു.