മാഴ്‌സെല്ലെ: ഇംഗ്ലണ്ട്-റഷ്യ മത്സരത്തിനിടെ കാണികളുടെ കൈയാങ്കളി. മത്സരത്തിന്റെ അധിക സമയം അവസാനിച്ചതോടെ റഷ്യന്‍ കാണികള്‍ ഇംഗ്ലണ്ട് കാണികള്‍ക്കു നേരെ പ്ലാസ്റ്റിക് കുപ്പികളും മറ്റും വലിച്ചെറിഞ്ഞു. തുടര്‍ന്ന് റഷ്യന്‍ കാണികള്‍ ഇംഗ്ലീഷ് കാണികള്‍ ഇരുന്ന സ്റ്റാന്‍ഡിലേക്ക് കയറിച്ചെല്ലുകയും അവരെ ആക്രമിക്കുകയുമായിരുന്നു.

ആക്രമണത്തെ തുടര്‍ന്ന് പുറത്തേക്കുള്ള വഴിയിലേക്ക് ഓടിയ ഇംഗ്ലണ്ട് കാണികള്‍ ക്ക് പരുക്കേല്‍ക്കുകയും ചെയ്തു. ആക്രമകാരികള്‍ ഇംഗ്ലണ്ടിന്റെ പതാക നശിപ്പിക്കുകയും പലരെയും മര്‍ദിക്കുകയും ചെയ്തു. അക്രമകാരികളെ നിയന്ത്രിക്കുന്നതില്‍ സുരക്ഷാ ജീവനക്കാര്‍ പരാജയപ്പെട്ടെന്നാണ് ആരോപണം.

ഇരുടീമുകള്‍ക്കും യുവേഫ മുന്നറിയിപ്പ് നല്‍കിയിട്ടുണ്ട്. ഇത്തരം നടപടികള്‍ ഇരുരാജ്യങ്ങളിലേയും കാണികളുടെ ഭാഗത്തു നിന്നുണ്ടായാല്‍ ഇരുരാജ്യങ്ങളെയും ടൂര്‍ണമെന്റില്‍ നിന്ന് പുറത്താക്കുമെന്ന് യുവേഫ എക്‌സിക്യൂട്ടീവ് കമ്മിറ്റി പറഞ്ഞു. ടീമിനെ പിന്തുണയ്ക്കുന്നവര്‍ എന്ന രീതിയില്‍ ഇത്തരം സംഭവങ്ങള്‍ സ്റ്റേഡിയത്തില്‍ അരങ്ങേറാന്‍ യുവേഫ അനുവദിക്കില്ല. ഇതിനെതിരേ പ്രതിരോധ മാര്‍ഗങ്ങള്‍ സ്വീകരിക്കുമെന്നും സംഘടന പ്രസ്താവനയില്‍ വ്യക്തമാക്കി.