മനാമ: മലയാളി യുവാവിനെ ബഹ്‌റൈനിലെ താമസസ്ഥലത്ത് മരിച്ചനിലയില്‍ കണ്ടെത്തി. ഇവിടെ സീഫ് ഹവാന സൂപ്പര്‍ മാര്‍ക്കറ്റില്‍ ജീവനക്കാരനായ കോഴിക്കോട് വടകര പാലോളിപ്പാലം സ്വദേശി മീത്തലെ മഠത്തില്‍ രാജേഷിനെ (39)യാണ് ഷിഫ അല്‍ജസീറ മെഡിക്കല്‍ സെന്ററിനുസമീപമുള്ള താമസ സ്ഥലത്ത് കഴിഞ്ഞ ദിവസം മരിച്ച നിലയില്‍ കണ്ടെത്തിയത്.

20 ദിവസങ്ങള്‍ക്കു മുമ്പാണ് രാജേഷ് നാട്ടില്‍ പോയി ബഹ്‌റൈനില്‍ തിരിച്ചെത്തിയത്. രണ്ടുവര്‍ഷം മുമ്പ് വിവാഹം കഴിഞ്ഞിരുന്നു.

പരേതനായ നാണുവാണ് അഛന്‍. അമ്മ: വിമല. ഭാര്യ: ഷീജ. സഹോദരികള്‍: റീന. ഷീന. എല്ലാവരും നാട്ടിലാണ്. പൊലിസ് കേസെടുത്ത് അന്വേഷണം ആരംഭിച്ചു. മൃതദേഹം നാട്ടിലേക്ക് കൊണ്ടുപോകാനുള്ള നടപടികള്‍ സ്വീകരിച്ചു വരുന്നു.