തൃശ്ശൂര്‍: സംസ്ഥാന സര്‍ക്കാര്‍ തൃശൂര്‍ ജില്ലയില്‍ നടപ്പിലാക്കാന്‍ പോകുന്ന മാലിന്യത്തില്‍ നിന്നും ഊര്‍ജം ഉല്‍പാദിപ്പിക്കുന്ന ആധുനിക മാലിന്യ സംസ്‌കരണ പ്ലാന്റുമായി ബന്ധപ്പെട്ട യോഗം ജില്ലാ കലക്ടറേറ്റില്‍ ചേര്‍ന്നു. പദ്ധതിയുടെ മാതൃക, നടത്തിപ്പ്, സാങ്കേതിക വശങ്ങള്‍ എന്നിവ പദ്ധതി നടത്തിപ്പിന് സര്‍ക്കാര്‍ ചുമതലപ്പെടുത്തിയിരിക്കുന്ന നോഡല്‍ ഏജന്‍സിയായ കെ.എസ്.ഐ.ഡി.സിയിലെ ഉദ്യോഗസ്ഥര്‍ യോഗത്തില്‍ വിശദീകരിച്ചു.
പൂര്‍ണമായും പൊതു സ്വകാര്യ പങ്കാളിത്തത്തോടുകൂടി നടക്കുന്ന പദ്ധതിയില്‍ അത്യാധുനിക സാങ്കേതികവിദ്യ ഉപയോഗിച്ച് പ്രവര്‍ത്തിക്കുന്ന അന്താരാഷ്ട്ര നിലവാരത്തിലുള്ള പ്ലാന്റുകളായിരിക്കും സ്ഥാപിക്കുന്നത്. പാന്റ് പൂര്‍ണമായും പരിസ്ഥിതി സൗഹാര്‍ദമായാണ് പ്രവര്‍ത്തിക്കുന്നത്. വിദേശ രാജ്യങ്ങളില്‍ വര്‍ഷങ്ങളായി വിജയകരമായി പ്രവര്‍ത്തിക്കുന്ന മാതൃകയിലായിരിക്കും ഈ പ്ലാന്റിന്റെ പ്രവര്‍ത്തനവും.
പദ്ധതി നടപ്പാകുന്നതോടെ തൃശൂര്‍ ജില്ല നേരിടുന്ന മാലിന്യ പ്രശ്‌നത്തിന് ശാശ്വത പരിഹാരമുണ്ടാകുമെന്ന് യോഗത്തില്‍ വിശദീകരിച്ചു.
ജില്ലാ കലക്ടര്‍ ടി.വി അനുപമ അധ്യക്ഷയായ യോഗത്തില്‍ അനുബന്ധ വകുപ്പ് ഉദ്യോഗസ്ഥരും കൗണ്‍സിലര്‍മാരും ലാലൂര്‍ നിവാസികളും പങ്കെടുത്തു. കൗണ്‍സിലര്‍മാരും പ്രദേശവാസികളും മാലിന്യ സംസ്‌കരണ പ്ലാന്റ് എന്ന പദ്ധതിക്ക് അനുകൂലമാണെങ്കിലും നഗര ഹൃദയത്തുള്ള ലാലൂരില്‍ നടപ്പാക്കുന്നതിലുള്ള ആശങ്ക അറിയിച്ചു. വിവിധ സര്‍ക്കാര്‍ വകുപ്പുകള്‍ക്ക് കീഴിലുള്ള അനുയോജ്യമായ മറ്റ് സ്ഥലങ്ങള്‍ ഈ പദ്ധതിക്കായി പരിഗണിക്കേണ്ടതാണെന്നും അവര്‍ ആവശ്യപ്പെട്ടു.
പദ്ധതിയുമായി ബന്ധപ്പെട്ട് തദ്ദേശവാസികളുടെയും ജനപ്രതിനിധികളുടെയും പ്രതികരണങ്ങളും ആശങ്കകളും ഉദ്യോഗസ്ഥര്‍ സര്‍ക്കാരിനെ അറിയിക്കണമെന്നും പ്രദേശവാസികള്‍ പറഞ്ഞു.