കോഴിക്കോട്: മിഠായിത്തെരുവ് തീപിടിത്തത്തില്‍ അട്ടിമറി ശ്രമമുണ്ടെന്നും സംഭവത്തെക്കുറിച്ച് സമഗ്രാന്വേഷണം നടത്തണമെന്നും വ്യാപാരി വ്യവസായി ഏകോപന സമിതി നേതാവ് ടി നസ്‌റുദ്ദീന്‍. കോഴിക്കോട്ട് മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഇക്കഴിഞ്ഞ ഫെബ്രുവരി 22നാണ് മിഠായിത്തെരുവിലെ മോഡേണ്‍വസ്ത്രാലയത്തിന്റെ മൂന്നു നിലകള്‍ കത്തി നശിച്ചത്. കടയ്ക്ക് തീ പിടിച്ച സമയത്ത് അവിടെ നിന്നു വെള്ള വസ്ത്രം ധരിച്ച ഒരാള്‍ ഇറങ്ങിയോടുന്നത് അവിടെയുണ്ടായിരുന്നവര്‍ കണ്ടുവെന്ന് പറഞ്ഞ നസ്‌റുദ്ദീന്‍ ഇനിയും ഇവിടെ ഈ വര്‍ഷം തന്നെ തീപിടിത്തമുണ്ടാവുമെന്നും പറഞ്ഞു. മിഠായിത്തെരുവിലെ തീ പിടിത്തങ്ങള്‍ക്കു പിന്നില്‍ വന്‍ അട്ടിമറിയും ഗൂഢാലോചനയുമുണ്ട്. ഭൂമാഫിയകളാണ് ഇതിനു പിന്നിലെന്നും നസ്‌റുദ്ദീന്‍ ആരോപിച്ചു.