ന്യൂഡല്‍ഹി: നിര്‍ഭയാ കേസില്‍ വധശിക്ഷയ്ക്കു വിധിക്കപ്പെട്ട തന്റെ ദയാ ഹരജി തള്ളിയ രാഷ്ട്രപതിയുടെ നടപടിക്കെതിരേ പ്രതി വിനയ് ശര്‍മ സുപ്രിംകോടതിയില്‍. ഇന്നലെയാണ് പ്രതി ഹരജി സമര്‍പ്പിച്ചത്. നേരത്തെ, മറ്റൊരു പ്രതി മുകേഷ് സിങ് ഇതേ ആവശ്യമുന്നയിച്ച് സമര്‍പ്പിച്ച ഹരജി സുപ്രിംകോടതി തള്ളിയിരുന്നു.
വധശിക്ഷ നടപ്പാക്കുന്നതു നീട്ടിക്കൊണ്ടുപോകുന്നതിനായി നിര്‍ഭയാ കേസ് പ്രതികള്‍ മനഃപൂര്‍വം നിയമത്തെ ദുരുപയോഗം ചെയ്യുകയാണെന്ന ആരോപണം നിലനില്‍ക്കേയാണ് പുതിയ ഹരജി. അഭിഭാഷകനായ എ.പി സിങ് മുഖേന സമര്‍പ്പിച്ച ഹരജയില്‍, വധശിക്ഷ ജീവപര്യന്തമാക്കി ഇളവുചെയ്യണമെന്നാണ് വിനയ് ശര്‍മ ആവശ്യപ്പെട്ടിരിക്കുന്നത്. ഈ മാസം ഒന്നിനായിരുന്നു വിനയ് ശര്‍മയുടെ ദയാ ഹരജി രാഷ്ട്രപതി തള്ളിയത്.
നേരത്തെ ജനുവരി 22ന് പ്രതികളുടെ ശിക്ഷ നടപ്പാക്കാന്‍ പാട്യാലാ ഹൗസ് കോടതി മരണവാറന്‍ഡ് പുറപ്പെടുവിച്ചിരുന്നു. പ്രതികള്‍ ഓരോരുത്തരായി ഹരജികള്‍ സമര്‍പ്പിച്ചതോടെ പിന്നീട് ഇതു ഫെബ്രുവരി ഒന്നിലേക്കു മാറ്റി. എന്നാല്‍, പിന്നെയും പ്രതികള്‍ ഹരജികള്‍ സമര്‍പ്പിച്ച് ശിക്ഷ നടപ്പാക്കുന്നതു വൈകിച്ചതോടെ ഇവരുടെ മരണവാറന്‍ഡ് പുതിയ ഒരു ഉത്തരവുണ്ടാകുന്നതുവരെ സ്റ്റേ ചെയ്ത് ഡല്‍ഹി പാട്യാലാ ഹൗസ് കോടതി ഉത്തരവിട്ടിരുന്നു. ഇതിനെ ചോദ്യം ചെയ്തു കേന്ദ്രസര്‍ക്കാര്‍ സമര്‍പ്പിച്ച ഹരജിയില്‍, പ്രതികള്‍ക്കു നിയമ അവകാശങ്ങള്‍ ഉപയോഗപ്പെടുത്തുന്നതിനായി ഒരാഴ്ചത്തെ സമയം അനുവദിച്ചിരിക്കേയാണ് പുതിയ ഹരജി.
കേസില്‍ മുകേഷ് സിങ്, അക്ഷയ് കുമാര്‍, വിനയ് ശര്‍മ, പവന്‍ ഗുപ്ത എന്നിവരെയാണ് തൂക്കിലേറ്റാന്‍ വിധിച്ചിരിക്കുന്നത്.