ഉബൈദുല്ല റഹ്മാനി

മനാമ: ഡല്‍ഹി നിയമ സഭാ തെരഞ്ഞെടുപ്പില്‍ ഉജ്ജ്വല വിജയം നേടിയ മുഖ്യമന്ത്രി അരവിന്ദ് കെജ്രിവാളിന്റെ നേതൃത്വത്തിലുള്ള ആം ആദ്മിയുടെ വിജയത്തില്‍ പ്രവാസ ലോകത്തും ആഘോഷം. പാര്‍ട്ടിയുടെ വിജയം ബഹ്‌റൈനിലെ പ്രവര്‍ത്തകര്‍ മനാമ സെന്‍ട്രല്‍ മാര്‍ക്കറ്റില്‍ പ്രവാസികളോടൊപ്പം മധുരം പങ്കുവെച്ചാണ് ആഘോഷിച്ചത്. ബഹ്‌റൈനിലെ ആം ആദ്മി ബഹ്‌റൈന്‍ കൂട്ടായ്മ ഭാരവാഹികളും പ്രധാന പ്രവര്‍ത്തകരുമെല്ലാം ഇവിടെ സംഗമിച്ചു.

ബിജെപി ഉയര്‍ത്തിയ വര്‍ഗീയ രാഷ്ട്രീയത്തിന് എതിരെ ഡല്‍ഹിയില്‍ ആംആദ്മി പാര്‍ട്ടിയുടെ വിജയം വികസനത്തിനും മതേതരത്വത്തിനും വേണ്ടി നിലകൊള്ളുന്നവര്‍ക്കു ആശാവഹമാണെന്ന് ആം ആദ്മി ബഹ്‌റൈന്‍ കൂട്ടായ്മ കണ്‍വീനര്‍ നിസാര്‍ കൊല്ലം പറഞ്ഞു.

ഇന്‍ഡ്യയുടെ ഭാവി രാഷ്ട്രീയത്തില്‍ ആം ആദ്മി പാര്‍ട്ടി എഴുതിതള്ളാന്‍ കഴിയാത്ത ശക്തിയായി സാധാരണ ജനങ്ങളില്‍ വളര്‍ന്നു വരുകയാണെന്നും ആം ആദ്മി ബഹ്‌റൈന്‍ കൂട്ടായ്മ അഭിപ്രായപ്പെട്ടു. രക്ഷാധികാരി കെ.ആര്‍ നായര്‍, സെക്രട്ടറി വിനു ക്രിസ്റ്റി, എക്‌സിക്യൂട്ടീവ് അംഗങ്ങള്‍ സിബിന്‍ സലീം, അസ്‌കര്‍ പൂഴിത്തല, ഫൈസല്‍ സല്മാബാദ്, ഹെന്റി, ഫര്‍ഹാന്‍ എന്നിവര്‍ സംബന്ധിച്ചു.