ഔറംഗബാദ്: പൗരത്വ ഭേദഗതി നിയമത്തിനെതിരേ സമാധാനപരമായി പ്രക്ഷോഭം നടത്തുന്നവരെ രാജ്യദ്രോഹികളെന്നും ദേശവിരുദ്ധരെന്നും വിളിക്കാനാവില്ലെന്ന് ബോംബെ ഹൈക്കോടതി. പൗരത്വ നിയമത്തിനെതിരായ പ്രതിഷേധങ്ങള്‍ തടയാനായി നിരോധനാജ്ഞ (144) പ്രഖ്യാപിച്ച നടപടി റദ്ദാക്കിക്കൊണ്ടാണ് ബോംബെ ഹൈക്കോടതിയുടെ ഔറംഗബാദ് ബെഞ്ച് ശ്രദ്ധേയമായ ഈ നിരീക്ഷണം നടത്തിയത്.

ജസ്റ്റിസുമാരായ ടി.വി. നലാവഡെ, എം.ജി.സെവ്‌ലിക്കര്‍ എന്നിരുടെ ബെഞ്ചാണ് കേസ് പരിഗണിച്ചത്. സമരക്കാര്‍ക്ക് പ്രതിഷേധം നടത്താന്‍ അനുമതി നിഷേധിച്ച പൊലിസിന്റെയും മജിസ്‌ട്രേറ്റിന്റെയും ഉത്തരവുകള്‍ കോടതി റദ്ദാക്കി. 144 പ്രഖ്യാപിച്ചത് ചോദ്യം ചെയ്തും സമാധാനപരമായ പ്രതിഷേധപ്രകടനങ്ങള്‍ക്ക് അനുമതി തേടിയും ഇഫ്തിക്കര്‍ സാക്കി ഷെയ്ഖ് എന്നയാള്‍ നല്‍കിയ ഹര്‍ജിയിലാണ് കോടതി ഇക്കാര്യം വ്യക്തമാക്കിയത്.

ബീഡ് ജില്ലയില്‍ പൗരത്വ നിയമ ഭേദഗതിക്കെതിരെ അനിശ്ചിതകാല പ്രതിഷേധം നടത്താന്‍ തീരുമാനിച്ചവര്‍ക്കാണ് അനുമതി നിഷേധിക്കപ്പെട്ടത്. പ്രതിഷേധം നടത്താന്‍ ജനുവരി 21ന് പൊലിസും ജനുവരി 31ന് മജിസ്‌ട്രേട്ടുമാണ് ഇവര്‍ക്ക് അനുമതി നിഷേധിച്ചത്.

 സമാധാനപരമായി പ്രതിഷേധിക്കാനുള്ള ജനങ്ങളുടെ അവകാശം  നിഷേധിക്കാനാവില്ലെന്നും കോടതി വ്യക്തമാക്കി. ിവിധ പ്രക്ഷോഭങ്ങളെ നിയന്ത്രിക്കാന്‍ എന്ന പേരിലാണെങ്കിലും നിരോധനാജ്ഞ കൃത്യമായും പൗരത്വ പ്രതിഷേധത്തിനെതിരെയാണെന്നും കോടതി വിലയിരുത്തി.