ഗൂഡല്ലൂര്‍: ദക്ഷിണേന്ത്യയിലെ പ്രധാന കടുവാ കേന്ദ്രമായ നീലഗിരിയിലെ മുതുമല കടുവാസംരക്ഷണ കേന്ദ്രം കൊടും വരള്‍ച്ചയില്‍. 321 ചതുരശ്ര കിലോമീറ്റര്‍ ചുറ്റളവില്‍ സ്ഥിതിചെയ്യുന്ന മുതുമല കടുത്ത വേനല്‍ ചൂടില്‍ വെന്തുരുകുകയാണ്. വന്യജീവി സങ്കേതത്തിലെ കുളങ്ങള്‍, തോടുകള്‍, ചെക്ക് ഡാമുകള്‍, നദി, കിണറുകള്‍ തുടങ്ങിയ ജലസ്രോതസുകളെല്ലാം വറ്റി.
വന്യജീവികള്‍ക്ക് ഏക ആശ്വാസമായിരുന്ന മായാര്‍ നദിയും വരണ്ടിരിക്കുകയാണ്. മുന്‍ വര്‍ഷങ്ങളെ അപേക്ഷിച്ച് മുതുമലയില്‍ വരള്‍ച്ച അതിരൂക്ഷമായിരിക്കുകയാണ്. ഇതേത്തുടര്‍ന്ന് വന്യജീവികള്‍ ദാഹജലം തേടി പാലായനം ചെയ്യുകയാണ്. ആന, കടുവ, കരടി, കാട്ടുപോത്ത്, മാന്‍, ചെന്നായ, മയില്‍ തുടങ്ങിയ ധാരാളം വന്യജീവികള്‍ സങ്കേതത്തിലുണ്ട്. വന്യജീവികള്‍ക്ക് ഉപയോഗിക്കാന്‍ വനംവകുപ്പ് ടാങ്കറുകളില്‍ ജലം എത്തിക്കുന്നുണ്ടെങ്കിലും അതും ഫലപ്രദമായിട്ടില്ല. ഡിസംബര്‍ മുതലാണ് ജലം നിറക്കാന്‍ തുടങ്ങിയത്. പ്രതിദിനം 20000 ലിറ്റര്‍ ജലമാണ് വനത്തിനുള്ളിലെ ടാങ്കുകളില്‍ നിറക്കുന്നത്. കുടിവെള്ളം തേടി വന്യജീവികള്‍ ജനവാസ കേന്ദ്രങ്ങളിലേക്ക് ഇറങ്ങാനും തുടങ്ങിയിട്ടുണ്ട്. വൃക്ഷങ്ങളും അടിക്കാടുകളും ഉണങ്ങി മുതുമല വനത്തിലെ പച്ചപ്പുകളെല്ലാം നഷ്ടപ്പെട്ടിരിക്കുകയാണ്. നൂറ്റാണ്ടിലെ കടുത്ത വരള്‍ച്ചയിലേക്കാണ് നീങ്ങുന്നതെന്നാണ് കാലാവസ്ഥാ നിരീക്ഷര്‍ പറയുന്നത്. മുതുമല വന്യജീവി സങ്കേതം കാട്ടുതീ ഭീഷണിയിലാണ്. വനപാലകര്‍ വനമേഖലയില്‍ നിരീക്ഷണം നടത്തി വരികയാണ്. വരള്‍ച്ചകാരണം മുതുമലയില്‍ നാല് കാട്ടാനകളാണ് ഒരുമാസത്തിനിടെ ചരിഞ്ഞത്.