ലഖ്‌നോ: കൊടുംകുറ്റവാളികളും ശതകോടീശ്വരന്മാരുമടങ്ങുന്ന സ്ഥാനാര്‍ഥികളെ കൊണ്ട് കൂടി ശ്രദ്ധ നേടുകയാണ് യു.പി ആറാംഘട്ട തെരഞ്ഞെടുപ്പ്. കിഴക്കന്‍ ഉത്തര്‍പ്രദേശില്‍ 'ബാഹുബലികളെ'തന്നെയാണ് എല്ലാ രാഷ്ട്രീയ പാര്‍ട്ടികളും അങ്കത്തിനിറക്കിയിരിക്കുന്നത്.
ആകെ 635 സ്ഥാനാര്‍ഥികളില്‍ 160 പേര്‍ ഒരു കോടിയിലേറെ പ്രഖ്യാപിത സ്വത്തുവകകള്‍ സ്വന്തമായുള്ളവരാണ്. പാര്‍ട്ടി അടിസ്ഥാനത്തില്‍ ബി.എസ്.പിക്കാണ് ഏറ്റവും കൂടുതല്‍ കോടീശ്വരന്മാരുള്ളത്. 35 പേരാണിത്. 33 കോടീശ്വരന്മാരുമായി തൊട്ടുപിന്നില്‍ ബി.ജെ.പിയുമുണ്ട്. എസ്.പിയുടെ 28ഉം കോണ്‍ഗ്രസിന്റെ ആറും ആര്‍.എല്‍.ഡിയുടെ എട്ടും പേര്‍ കോടീശ്വരന്മാരാണ്. ഇതിനു പുറമെ 23 സ്വതന്ത്ര കോടീശ്വരന്മാരും മത്സരരംഗത്തുണ്ട്.
118 കോടി രൂപയുടെ സ്വത്തുവകകളുള്ള ഗുദ്ദു ജമാലി എന്ന ഷാഹ് ആലമാണ് ഏറ്റവും വലിയ സമ്പന്നന്‍. രണ്ടാം സ്ഥാനത്ത് വിനയ്ശങ്കറും(67 കോടി) മൂന്നാം സ്ഥാനത്ത് ഐജാജ് അഹ്മദും(52 കോടി) ആണുള്ളത്. മൂവരും ബി.എസ്.പി സ്ഥാനാര്‍ഥികളാണ്. അതേസമയം, ഒരു സ്വത്തുമില്ലെന്ന് സത്യവാങ്മൂലത്തില്‍ വെളിപ്പെടുത്തിയ മൂന്നുപേരും മത്സരരംഗത്തുണ്ട്.
ക്രിമിനല്‍ പശ്ചാത്തലമുള്ള സ്ഥാനാര്‍ഥികളുടെ എണ്ണവും ഞെട്ടിക്കുന്നതാണ്. 126 പേര്‍ കുറ്റവാളികളാണെന്നു സത്യവാങ്മൂലത്തില്‍ സ്വയം വെളിപ്പെടുത്തിയിട്ടുണ്ട്. ഇതില്‍ 109 പേരും കൊടുംകുറ്റവാളികളാണ്. കൊലപാതകം, കൊലപാതകശ്രമം, തട്ടിക്കൊണ്ടുപോകല്‍, സ്ത്രീകള്‍ക്കെതിരേയുള്ള കുറ്റകൃത്യം തുടങ്ങിയ ഭീകരകുറ്റങ്ങളാണ് ഇവര്‍ക്കെതിരേയുള്ളത്.
കുറ്റവാളികളുടെ എണ്ണത്തിലും ബി.എസ്.പിയാണു മുന്നിലുള്ളത്. 24 പേര്‍. ബി.ജെ.പി 18ഉം എസ്.പി 15ഉം ആര്‍.എല്‍.ഡി അഞ്ചും സി.പി.ഐ നാലും കോണ്‍ഗ്രസ് മൂന്നും കുറ്റവാളികളെ മത്സരരംഗത്തിറക്കിയപ്പോള്‍ 22 പേര്‍ സ്വതന്ത്രരായും ജനവിധി തേടുന്നു.
വിദ്യാഭ്യാസത്തിന്റെ കാര്യത്തില്‍ 229 പേരുടെ യോഗ്യത അഞ്ചുമുതല്‍ 12 വരെ ക്ലാസ് പഠനമാണ്. 338 പേര്‍ക്ക് ബിരുദമോ ബിരുദാനന്തര ബിരുദമോ ഉണ്ട്. 38 പേര്‍ സാക്ഷരരാണെന്നു വെളിപ്പെടുത്തിയപ്പോള്‍ മൂന്ന് നിരക്ഷരരും മത്സരിക്കാനുണ്ട്. ആകെ സ്ഥാനാര്‍ഥികളില്‍ വെറും 60 പേര്‍ മാത്രമാണു സ്ത്രീകള്‍.