മലപ്പുറം: കേന്ദ്രസര്‍ക്കാര്‍ കരിപ്പൂര്‍ വിമാനത്താവളത്തോടു കാണിക്കുന്ന വിവേചനത്തിനെതിരേ ജില്ലാപഞ്ചായത്തിന്റെ നേതൃത്വത്തില്‍ ജനപ്രതിനിധികള്‍ നടത്തിയ ദൂരദര്‍ശന്‍ മാര്‍ച്ച് സി.പി.എം ബഹിഷ്‌കരിച്ചു. മലപ്പുറം പാര്‍ലമെന്റ് തെരഞ്ഞെടുപ്പ് മുന്നില്‍കണ്ടാണ് പരിപാടി സംഘടിപ്പിക്കുന്നതെന്നാരോപിച്ചാണ് സി.പി.എം അംഗങ്ങള്‍ വിട്ടുനിന്നത്. ജില്ലാപഞ്ചായത്ത് യോഗത്തില്‍ മാര്‍ച്ച് നടത്താന്‍ തീരുമാനിച്ചപ്പോഴും തുടര്‍ന്നു മാര്‍ച്ചുമായി ബന്ധപ്പെട്ട യോഗങ്ങളിലും സി.പി.എം അംഗങ്ങള്‍ എതിര്‍പ്പ് പ്രകടിപ്പിച്ചിരുന്നില്ല. മാര്‍ച്ച് നടക്കുന്നതിന്റെ തലേദിവസം പങ്കെടുക്കില്ലെന്നു സംഘാടകരെ അറിയിക്കുകയായിരുന്നു. സി.പി.എം അംഗങ്ങള്‍ മാര്‍ച്ചില്‍ പങ്കെടുക്കാത്തതിലുള്ള പ്രതിഷേധം യു.ഡി.എഫ് നേതാക്കള്‍ പ്രസംഗത്തില്‍ സൂചിപ്പിക്കുകയും ചെയ്തു.