ബെയ്ജിങ്: ചൈനയില്‍ പുതുതായി കൊറോണ വൈറസ് (കോവിഡ്-19) ബാധിക്കുന്നവരുടെ എണ്ണത്തില്‍ കുറവ് വന്നിട്ടുണ്ടെങ്കിലും ദക്ഷിണ കൊറിയ, ഇറാന്‍, ഇറ്റലി തുടങ്ങിയ രാജ്യങ്ങളില്‍ വൈറസ് പടര്‍ന്നു പിടിക്കുന്നത് ആശങ്കക്കിടയാക്കുന്നു. ഇറ്റലിയില്‍ വൈറസ് ബാധിച്ച് രണ്ടുപേര്‍ മരിച്ചതായി അധികൃതര്‍ അറിച്ചു. വൈറസ് വ്യാപിച്ചതിനെ തുടര്‍ന്ന് അവിടെ 10 നഗരങ്ങള്‍ അടച്ചു. അര ലക്ഷംപേരോട് വീടു വിട്ട് പുറത്തുപോവരുതെന്ന് നിര്‍ദേശിച്ചിട്ടുണ്ട്.
ഇറാനില്‍ കൊറോണ ബാധിച്ച് മരിച്ചവരുടെ എണ്ണം അഞ്ചായി. ദക്ഷിണ കൊറിയയില്‍ കൊറോണ സ്ഥിരീകരിച്ചവരുടെ എണ്ണം 433 ആയി ഉയര്‍ന്നു. പശ്ചിമേഷ്യയില്‍ ഇസ്രാഈലിലും ലബ്‌നാനിലും പുതുതായി വൈറസ് ബാധ സ്ഥിരീകരിച്ചു. ഇറാനില്‍ 10 പേര്‍ക്കു കൂടി വൈറസ് സ്ഥിരീകരിച്ചിട്ടുണ്ട്. വൈറസ് ഭീതി പടര്‍ത്തിയതോടെ ഇറാഖിലേക്കുള്ള തീര്‍ത്ഥാടന യാത്ര ഇറാന്‍ വിലക്കിയിരിക്കുകയാണ്.
വൈറസ് മറ്റു രാജ്യങ്ങളിലേക്കും പടര്‍ന്നു പിടിക്കാനുള്ള സാധ്യത കൂടുതലാണെന്ന് ലോകാരോഗ്യസംഘടന മുന്നറിയിപ്പ് നല്‍കി. അതിനിടെ ചൈനയില്‍ മരണസംഖ്യ 2,345 ആയി ഉയര്‍ന്നു. പുതുതായി 109 മരണമാണ് റിപോര്‍ട്ട് ചെയ്തത്. വെള്ളിയാഴ്ച 397 പേര്‍ക്കാണ് വൈറസ് സ്ഥിരീകരിച്ചത്. ഇതുവരെ ചൈനയില്‍ 76,288 പേര്‍ക്ക് വൈറസ് സ്ഥിരീകരിച്ചു.