കൊടുങ്ങല്ലൂര്‍: കൊടുങ്ങല്ലൂര്‍ നഗരത്തില്‍ വ്യാപാരികളും ബസ് ജീവനക്കാരും തമ്മില്‍ സംഘട്ടനം. നാല് പേര്‍ക്ക് പരുക്ക്. കൊടുങ്ങല്ലൂര്‍  തൃശൂര്‍ റൂട്ടില്‍ സ്വകാര്യ ബസുകളുടെ മിന്നല്‍ പണിമുടക്ക്. നഗരത്തില്‍ വ്യാപാരികള്‍ ഹര്‍ത്താല്‍ ആചരിച്ചു. കൊടുങ്ങല്ലൂര്‍ ചന്തപ്പുരയില്‍ നഗരസഭ ബസ് സ്റ്റാന്‍ഡ് പരിസരത്ത് ഉച്ചതിരിഞ്ഞായിരുന്നു സംഭവം.
ബസ് സ്റ്റാന്‍ഡ് പരിസരത്തുള്ള നാലുമാക്കല്‍ പെയിന്റ്‌സ് എന്ന സ്ഥാപനത്തിന്റെ ഗോഡൗണിന് മുന്നില്‍ ആളൊഴിഞ്ഞ സ്വകാര്യ ബസ് നിര്‍ത്തിയിട്ടതിനെ ചൊല്ലിയുണ്ടായ തര്‍ക്കം സംഘട്ടനത്തില്‍ കലാശിക്കുകയായിരുന്നു. സംഘട്ടനത്തില്‍ പരുക്കേറ്റ വ്യാപാരികളായ നാലുമാക്കല്‍ ജീവന്‍(45), കൈതക്കാട്ട് നന്ദകുമാര്‍(45), പനങ്ങാട്ട് പ്രവീണ്‍ (35) ബസ് ജീവനക്കാരനായ അലക്‌സ് എന്നിവരെ ആശുപത്രിയില്‍ പ്രവേശിപ്പിച്ചു.
സംഭവത്തെ തുടര്‍ന്ന് കൊടുങ്ങല്ലൂര്‍  തൃശൂര്‍ റൂട്ടില്‍ സ്വകാര്യ ബസുകള്‍ മിന്നല്‍ പണിമുടക്ക് നടത്തി. നഗരത്തില്‍ വ്യാപാരികള്‍ ഹര്‍ത്താലാചരിച്ചു. ബസ് പണിമുടക്കും ഹര്‍ത്താലും ജനങ്ങളെ വലച്ചു. വിദ്യാര്‍ഥികളും, ജീവനക്കാരുമുള്‍പ്പെടെയുള്ള യാത്രക്കാര്‍ വഴിയില്‍ കുടുങ്ങി. കൊടുങ്ങല്ലൂര്‍ പൊലിസ് കേസെടുത്തു.