കൊല്ലം: ദേശീയ ജൂനിയര്‍ വനിതാ ഹോക്കി ചാംപ്യന്‍ഷിപ്പിനു വര്‍ണാഭമായ തുടക്കം. ചാംപ്യന്‍ഷിപ്പ് ഗവര്‍ണര്‍ പി. സദാശിവം ഉദ്ഘാടനം ചെയ്തു. ഹോക്കിയുടെ സുവര്‍ണ കാലഘട്ടത്തില്‍ ഇന്ത്യന്‍ ഹോക്കി ടീം ഒളിംപിക്‌സ് മെഡല്‍ നേടിയത് ഗവര്‍ണര്‍ അനുസ്മരിച്ചു.
സമീപകാലത്തു പി.ആര്‍ ശ്രീജേഷിന്റെ നേതൃത്വത്തില്‍ ഇന്ത്യന്‍ ഹോക്കി ടീം നേടിയ വിജയം പുതിയ വളര്‍ന്നു വരുന്ന കായിക താരങ്ങള്‍ക്കു പ്രചോദനമാണെന്ന് അദ്ദേഹം പറഞ്ഞു.
ജയിക്കുന്നതിനേക്കാള്‍ പ്രാതിനിധ്യത്തിനാണു പ്രാധാന്യമെന്നും ഒരു ജോലി നേടുന്നതിനുള്ള കുറുക്കു വഴിയായി കായികമേഖലയെ കാണരുതെന്നും പി. സദാശിവം പറഞ്ഞു. ദേശീയ ജൂനിയര്‍ വനിതാ ഹോക്കി ചാംപ്യന്‍ഷിപ്പ് സംഘടിപ്പിക്കാന്‍ കേരള ഹോക്കി അസോസിയേഷന്‍ സ്വീകരിച്ച നടപടികളെ ഗവര്‍ണര്‍ അഭിനന്ദിക്കുകയും അതോടൊപ്പം കൊല്ലം ജില്ലയിലെ കായിക വികസനത്തിന് ജനപ്രതിനിധികള്‍ ശ്രദ്ധിക്കണമെന്നും അദ്ദേഹം പറഞ്ഞു.
കായിക വകുപ്പ് മന്ത്രി ഇ.പി ജയരാജന്‍ അധ്യക്ഷനായി. മന്ത്രിമാരായ ജെ. മേഴ്‌സികുട്ടി അമ്മ, കെ. രാജു, എം. മുകേഷ് എം.എല്‍.എ, മേയര്‍ വി. രാജേന്ദ്ര ബാബു, കേരള ഹോക്കി അസോസിയേഷന്‍ പ്രസിഡന്റ് വി. സുനില്‍കുമാര്‍, സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍, വാര്‍ഡ് കൗണ്‍സിലര്‍ ഹണി ബെഞ്ചമിന്‍ സംസാരിച്ചു.