ബേ ഓവല്‍: ന്യൂസിലന്‍ഡില്‍ ആധിപത്യം തുടരാന്‍ ഇന്ത്യ ഇന്നിറങ്ങുന്നു. ആദ്യ ഏകദിനത്തിലെ ജയത്തിന്റെ ആത്മവിശ്വാസത്തിലാണ് ഇന്ത്യ രണ്ടാം മത്സരത്തിനിറങ്ങുന്നത്. ഇന്ന് രാവിലെ 7.30നാണ് മത്സരം. അഞ്ചു മത്സര പരമ്പരയില്‍ 1-0നു മുന്നിലുള്ള ഇന്ത്യ ഇന്നത്തെ കളിയും ജയിച്ച് മേല്‍ക്കൈ നേടാമെന്ന ആത്മവിശ്വാസത്തിലാണ്. നാപ്പിയറില്‍ നടന്ന ആദ്യ ഏകദിനത്തില്‍ എട്ടു വിക്കറ്റിന്റെ തകര്‍പ്പന്‍ ജയമായിരുന്നു ഇന്ത്യയുടേത്. ബൗളര്‍മാരുടെ മാസ്മരിക പ്രകടനമാണ് ആദ്യ കളിയില്‍ ഇന്ത്യക്ക് അനായാസ ജയം നല്‍കിയത്. അതേസമയം, ആദ്യ മത്സരത്തിലെ പിഴവുകളില്‍നിന്ന് പാഠമുള്‍ക്കൊണ്ടണ്ട് പരമ്പരയിലേക്കു ശക്തമായ തിരിച്ചുവരവിന് കോപ്പ്കൂട്ടുകയാണ് കെയ്ന്‍ വില്ല്യംസണ്‍ നയിക്കുന്ന കിവീസ്.