തിരുവനന്തപുരം: കേരളത്തില്‍ നിന്നും പോയ മത്സ്യബന്ധന തൊഴിലാളികള്‍ തിരികെയെത്താനാകാതെ ഇറാനില്‍ കുടുങ്ങികിടക്കുന്നു. കൊറോണയുടെ സുരക്ഷാ നടപടികളുടെ പശ്ചാത്തലത്തില്‍ മുറിയില്‍ നിന്നും പുറത്തുപോകാനാവാത്ത വിധം തൊഴിലാളികള്‍ കുടുങ്ങിയിരിക്കുകയാണ്. തിരുവനന്തപുരം പൊഴിയൂര്‍, വിഴിഞ്ഞം, മരിയനാട് എന്നിവിടങ്ങളില്‍ നിന്നും മത്സ്യബന്ധന വിസയില്‍ ഇറാനിലേക്ക് പോയ 17 പേരാണ് പുറത്തിറങ്ങാന്‍ കഴിയാതെ മുറിയില്‍ കുടുങ്ങിയത്.നാലുമാസം മുന്‍പാണ് ഇവര്‍ ഇറാനിലേക്ക് പോയത്.

മത്സ്യതൊഴിലാളികളെ നാട്ടിലെത്തിക്കാന്‍ എല്ലാവിധ നടപടികളും ഉടന്‍ സ്വീകരിക്കുമെന്ന് ഫിഷറീസ് മന്ത്രി ജെ. മേഴ്‌സികുട്ടിയമ്മ പറഞ്ഞു. ഇറാനില്‍ കുടുങ്ങിക്കിടക്കുന്നവരുടെ വിവരങ്ങളും വിലാസവും നോര്‍ക്കയ്ക്ക് കൈമാറാനും അതുവഴി എംബസിയുടെ ശ്രദ്ധയില്‍പ്പെടുത്തി തൊഴിലാളികളെ തിരികെ കൊണ്ടുവരാനുമാണ് ശ്രമിക്കുന്നതെന്നും മന്ത്രി കൂട്ടിചേര്‍ത്തു. നിലവില്‍ വിഷയം മുഖ്യമന്ത്രിയുടെ ശ്രദ്ധയില്‍പ്പെടുത്തിയിട്ടുണ്ട്.