കൊച്ചി: കേന്ദ്ര പൊതുമേഖലാ സ്ഥാപനങ്ങളെ ശക്തിപ്പെടുത്തുന്ന സമീപനമാണ് സംസ്ഥാന സര്‍ക്കാര്‍ സ്വീകരിച്ചിരിക്കുന്നതെന്ന് മുഖ്യമന്ത്രി പിണറായി വിജയന്‍. പ്രധാനമന്ത്രി നരേന്ദ്ര മോദി ബി.പി.സി.എല്‍ പദ്ധതികളുടെ ഉദ്ഘാടനം നിര്‍വഹിച്ച ചടങ്ങില്‍ സംസാരിക്കുകയായിരുന്നു മുഖ്യമന്ത്രി. 16,504 കോടി രൂപയുടെ പദ്ധതി ഉദ്ഘാടനം ചെയ്യപ്പെടുന്നത് കേരളത്തിന്റെ വികസനത്തില്‍ ചരിത്രനിമിഷമാണ്. സംസ്ഥാന സര്‍ക്കാരിന്റെ പങ്കാളിത്തത്തോടെ ഒരു ലക്ഷം കോടി രൂപയുടെ നിക്ഷേപം വരുന്ന പെട്രോ കെമിക്കല്‍ പാര്‍ക്കിന് ഫാക്ടറിന്റെ കൈവശമുള്ള ഭൂമി നല്‍കുന്നതിനുള്ള നടപടികള്‍ നടക്കുകയാണ്.

ബി.പി.സി.എല്ലിന്റെ പെട്രോ കെമിക്കല്‍ കോംപ്ലക്‌സ് കേരളത്തിനു മുതല്‍ക്കൂട്ടായി മാറും. നികുതി ഇളവുകളും ഭൂമിയും നല്‍കുന്ന സമീപനമാണ് കേന്ദ്ര പൊതുമേഖലാ സ്ഥാപനങ്ങളോട് സ്വീകരിച്ചിട്ടുള്ളത്. ബി.പി.സി.എല്‍ പദ്ധതിയുടെ കാര്യത്തിലും സര്‍ക്കാര്‍ അത്തരമൊരു നിലപാടാണു സ്വീകരിച്ചിരിക്കുന്നതെന്നും മുഖ്യമന്ത്രി പറഞ്ഞു.