കൊച്ചി: ഐ.സി.സി ചാംപ്യന്‍സ് ട്രോഫി നേരിട്ടു കാണാന്‍ ക്രിക്കറ്റ് പ്രേമികള്‍ക്കു അവസരമൊരുക്കി നിസാന്‍ ട്രോഫി ടൂര്‍ കൊച്ചിയില്‍. മാര്‍ച്ച് ഒന്നിനു കൊല്‍ക്കൊത്തയില്‍ നിന്നു പ്രയാണമാരംഭിച്ച ഇന്ത്യയിലെ ട്രോഫി ടൂര്‍ മുംബൈയില്‍ പര്യടനം പൂര്‍ത്തിയാക്കിയ ശേഷമാണ് കൊച്ചിയിലെത്തിയത്. കൊല്‍ക്കത്ത, മുംബൈ, കൊച്ചി, ബംഗളൂരു, ഹൈദരാബാദ്, ഡല്‍ഹി, ചണ്ഡീഗഢ് എന്നിവിടങ്ങളില്‍ ട്രോഫി പ്രദര്‍ശനത്തിനു വയ്ക്കും.
ലുലു മാളില്‍ നൂറു കണക്കിനു പേരാണ് ട്രോഫി കാണാനെത്തിയത്. മാര്‍ച്ച് 16നു പര്യടനം അവസാനിക്കും. ഐ.സി.സിയുടെ ആഗോള പങ്കാളിയും ഔദ്യോഗിക കാര്‍ എന്ന നിലയിലും നിസാന്‍ രാജ്യത്തെ ഏഴു പ്രമുഖ നഗരങ്ങളില്‍ ട്രോഫി പ്രദര്‍ശനത്തിനെത്തിക്കും. ഇന്ത്യയിലെ പര്യടനത്തിനു ശേഷം ബംഗ്ലാദേശ്, ശ്രീലങ്ക, പാകിസ്താന്‍, ദക്ഷിണാഫ്രിക്ക, ന്യൂസിലന്‍ഡ്, ആസ്‌ത്രേലിയ, ഇംഗ്ലണ്ട് എന്നിവിടങ്ങളിലും പര്യടനം നടത്തും. ജൂണ്‍ ഒന്നിനു ഇംഗ്ലണ്ടും ബംഗ്ലാദേശും തമ്മിലുള്ള മത്സരത്തോടെയാണു ഐ.സി.സി ചാംപ്യന്‍ഷിപ്പ് ആരംഭിക്കുന്നത്.