കോഴിക്കോട്: കോഴിക്കോടിന്റെ സാംസ്‌കാരിക സായാഹ്നങ്ങളെ ജീവസുറ്റതാക്കിയ തിക്കോടിയനെന്ന എഴുത്തുകാരന്‍ ഓര്‍മയായിട്ട് 18 വര്‍ഷം കടന്നുപോയിട്ടും അദ്ദേഹത്തിന്റെ പേരില്‍ പ്രഖ്യാപിച്ച സ്മാരകം എങ്ങുമെത്തിയില്ല. എ.കെ ആന്റണി മുഖ്യമന്ത്രിയായിരുന്ന കാലത്താണ് സ്മാരകം നിര്‍മിക്കുമെന്ന് പ്രഖ്യാപിച്ചിരുന്നത്.  അന്ന് അഞ്ചു സെന്റ് സ്ഥലം അനുവദിച്ചതായി പ്രഖ്യാപിച്ചിരുന്നു. എന്നാല്‍ അതിനായി മാറ്റിവച്ച ആനക്കുളത്തെ സ്ഥലം സംഘാടകര്‍ക്ക് ബോധിച്ചില്ല. തുടര്‍ന്ന് മറ്റൊരിടത്ത് അഞ്ചു സെന്റ് സ്ഥലം അനുവദിക്കാമെന്നായി. അവിടെയും ആ സ്മാരകം ഉയര്‍ന്നില്ല. കോഴിക്കോട്ടെ പുഷ്പശ്രീ ട്രസ്റ്റിന്റെ നേതൃത്വത്തിലായിരുന്നു ഇതിനുള്ള ശ്രമങ്ങളെല്ലാം നടത്തിയിരുന്നത്. എന്നാല്‍ സംഘടനയുടെ മുഖ്യ കാര്യദര്‍ശിയുടെ അനാരോഗ്യത്തോടെ സ്മാരകത്തിനായി ഓടിപ്പായാന്‍ ആളില്ലാതെയായി. അദ്ദേഹം മരിച്ചതോടെ സംഘടനയുടെ പ്രവര്‍ത്തനങ്ങളും അസ്തമിച്ചതു പോലെയായി. തിക്കോടിയന്റെ പേരില്‍ ഏര്‍പ്പെടുത്തിയിരുന്ന പുരസ്‌കാരങ്ങളും ഇപ്പോള്‍ നിലച്ചിരിക്കുകയാണ്. രണ്ടു വര്‍ഷം അദ്ദേഹത്തിന്റെ ചരമദിനം പോലും ഓര്‍മിക്കാനും തിക്കോടിയന്റെ നഗരത്തില്‍നിന്ന് ആരും മുന്നോട്ടുവന്നില്ല. തിക്കോടിയന്‍ മുന്‍കൈയെടുത്ത് രൂപീകരിച്ച ട്രസ്റ്റിനും സമയമുണ്ടായില്ല.  തിക്കോടിയന്‍ എന്ന പി. കുഞ്ഞനന്തന്‍ നായര്‍ 2001 ജനുവരി 28നാണ് അന്തരിച്ചത്. കോഴിക്കോട്ടെ ദേശപോഷിണി ഗ്രന്ഥശാലയ്ക്കുവേണ്ടി എഴുതിയ 'ജീവിതം' എന്ന നാടകത്തിലൂടെയായിരുന്നു തുടക്കം. ആകാശവാണിക്കു വേണ്ടി നിരവധി റേഡിയോ നാടകങ്ങള്‍ രചിച്ചു. ശബ്ദസാധ്യതയെ മാത്രം ഉപയോഗപ്പെടുത്താനാകുന്ന റേഡിയോ നാടകങ്ങളെ ജനകീയമാക്കുന്നതിലും അദ്ദേഹം മുഖ്യപങ്കുവഹിച്ചു.  മനുഷ്യബന്ധങ്ങളെക്കുറിച്ചുള്ള ആഴത്തിലുള്ള പഠനങ്ങളായിരുന്നു തിക്കോടിയന്റെ രചനകള്‍. മനുഷ്യജീവിതത്തിലെ സ്‌നേഹവും പകയും പൊരുത്തക്കേടുകളും പൊരുത്തപ്പെടലുകളുമെല്ലാം ഉള്ളില്‍ തട്ടുന്ന തരത്തില്‍ അദ്ദേഹം അവതരിപ്പിച്ചിട്ടുണ്ട്. അരങ്ങു കാണാത്ത നടന്‍ എന്ന ആത്മകഥ പോലെ തന്നെയാവുകയാണ് അദ്ദേഹത്തിന്റെ സ്മാരകവും.
ആ സ്മാരകം ഇനി എന്ന് അരങ്ങ് കാണുമെന്നു തന്നെയാണ് അനുവാചകരും ചോദിക്കുന്നത്.