തിരുവനന്തപുരം: നിയമസഭാ സാമാജികര്‍ക്കായുളള പരിശീലന പരിപാടി നിയമസഭാ സമുച്ചയത്തിലെ ബജറ്റ് ഹാളില്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്തു. നിയമസഭാരീതികളെക്കുറിച്ച് അംഗങ്ങള്‍ സാമാന്യ അറിവ് നേടേണ്ടത് ആവശ്യമാണെന്ന് അദ്ദേഹം പറഞ്ഞു നിയമനിര്‍മാണത്തില്‍ ഓരോ അംഗത്തിനും തന്റേതായ പങ്കാളിത്തം ഉറപ്പാക്കാന്‍ സാധിക്കണം.

പുതിയ സാങ്കേതികവിദ്യകള്‍ പ്രയോജനപ്പെടുത്തി നിയമസഭാനടപടികളില്‍ പൊതുജന പങ്കാളിത്തം വര്‍ധിപ്പിക്കാന്‍ സാധ്യമാകുമോയെന്നു പരിശോധിക്കണമെന്നും മുഖ്യമന്ത്രി പറഞ്ഞു. നിയമസഭാ സബ്ജക്റ്റ് കമ്മിറ്റി അധ്യക്ഷന്‍മാരായി എം.എല്‍.എമാരെ നിയോഗിക്കണമെന്നു പ്രതിപക്ഷനേതാവ് രമേശ് ചെന്നിത്തല അധ്യക്ഷ പ്രസംഗത്തില്‍ ആവശ്യപ്പെട്ടു. മന്ത്രിമാരെ അധ്യക്ഷന്‍മാരായി നിയോഗിച്ചാല്‍ അവര്‍ മുന്‍ഗണന നല്‍കുന്നതു സര്‍ക്കാരിന്റെ അഭിപ്രായങ്ങള്‍ക്കായിരിക്കും. അത് കമ്മിറ്റികളുടെ സ്വതന്ത്രമായ പ്രവര്‍ത്തനത്തിനു തടസമാകുമെന്നും രമേശ് ചെന്നിത്തല പറഞ്ഞു. വികസന നായകനാകാനുളള പൊതുജനങ്ങളുടെ സമ്മര്‍ദ്ദത്തില്‍ നിന്നും മാറി നിയമനിര്‍മാണത്തില്‍ പങ്കാളികളാവുകയാണ് ഓരോ എം.എല്‍.എമാരും ചെയ്യേണ്ടതെന്ന് സ്പീക്കര്‍ പി. ശ്രീരാമകൃഷ്ണന്‍ സ്വാഗത പ്രസംഗത്തില്‍ പറഞ്ഞു. നിയമസഭാ സെക്രട്ടറി ഇന്‍ചാര്‍ജ്ജ് ജി. ജയലക്ഷ്മി, മന്ത്രിമാര്‍, എം.എല്‍.എമാര്‍ തുടങ്ങിയവര്‍ പങ്കെടുത്തു.