വെല്ലിങ്ടണ്‍: അമ്പയറിങില്‍ വ്യത്യസ്ത രീതികള്‍ക്ക് പ്രശസ്തനായ ബില്ലി ബൗഡനെ അന്താരാഷ്ട്ര ക്രിക്കറ്റ് കൗണ്‍സിലിന്റെ അമ്പയര്‍മാരുടെ എലൈറ്റ് പാനലില്‍ നിന്ന് ഒഴിവാക്കി. ന്യൂസിലന്‍ഡ് ക്രിക്കറ്റിനെ അന്താരാഷ്ട്ര പാനലില്‍ നിന്ന് പിന്‍വലിച്ചതിനെ തുടര്‍ന്നാണ് ബൗഡനെ ഒഴിവാക്കിയത്. ന്യൂസിലന്‍ഡില്‍ നിന്നുള്ള അമ്പയറാണ് ബില്ലി ബൗഡന്‍. നേരത്തെ 2013ല്‍ ബൗഡനെ ഒഴിവാക്കിയിരുന്നെങ്കിലും 2014ല്‍ തിരിച്ചെത്തിയിരുന്നു.

84 ടെസ്റ്റ് മത്സരങ്ങള്‍, 200 ഏകദിന മത്സരങ്ങള്‍ എന്നിവ 21 വര്‍ഷത്തെ കരിയറില്‍ അമ്പയറിങ് ചെയ്യാന്‍ ബൗഡന് സാധിച്ചിട്ടുണ്ട്. കാണികളെ തന്റെ പ്രത്യേക തരം അമ്പയറിങിനാല്‍ സ്വാധീനിക്കാന്‍ ബൗഡന് സാധിച്ചിട്ടുണ്ട്. വിരലുകള്‍ മടക്കി ഔട്ട് വിധിക്കുന്ന ബൗഡന്റെ രീതി ഏറെ ശ്രദ്ധിക്കപ്പെട്ടിരുന്നു. സന്ധി വാതത്തെ തുടര്‍ന്ന് വിരലുകള്‍ നിവര്‍ത്താന്‍ സാധിക്കാത്തതിനാലാണ് ഇതെന്ന് ബൗഡന്‍ വെളിപ്പെടുത്തിയിരുന്നു. അതേസമയം ബൗഡനെ തഴഞ്ഞതിന് വിശദീകരണം നല്‍കാന്‍ ഐ.സി.സി തയ്യാറായിട്ടില്ല.